Япония КХДРга нисбатан санкция режимини бузган Россиянинг уч нафар жисмоний ва тўртта юридик шахсига қарши санкциялар киритди. Бу ҳақда Япония ТИВ сайтида маълум қилинган.

Рўйхатдан россиялик Александр Гаэвой, Александр Часовников ва Роман Алар, шунингдек, «Apolloн», «РК Бриз», «Зил — М» ва «Парсек» компаниялари ўрин олган. Улар Шимолий Кореянинг ядровий ва баллистик лойиҳаларида иштирок этишда айбланмоқда. Эндиликда уларнинг Япония ҳудудидаги барча активлари «музлатилади».

Россия фуқаролари ва рус компанияларидан ташқари Япония олти нафар КХДР фуқаросига қарши ҳам санкция киритган.

Россия 24 февралда Украина ҳудудида махсус ҳарбий операцияларни бошлаганидан кейин ЕИ, АҚШ, Буюк Британия, Канада, Жанубий Корея, Австралия ва бошқа давлатлар россиялик бизнесменлар, топ-менежерлар, сиёсатчилар ва амалдорларга нисбатан бир қатор тақиқ ҳамда чеклов пакетларини жорий этган.

Осиёда биринчи бўлиб Япония Россиянинг қатор компанияларига қарши санкцияларни киритди: «Миасс» автомобиль заводи, «Вимпел» кемасозлик заводи, «Амур» кемасозлик заводи, «Байкал Электроникс» электроника ишлаб чиқарувчиси, «Стрела» ишлаб чиқариш мажмуаси, «Звезда» машинасозлик заводи ва бошқалар.

Бундан ташқари, бош вазир Фумио Кисида Япония Россияни савдодаги энг қулай давлат мақомидан маҳрум қилиш, унинг рақамли активлар ёрдамида молиявий санкцияларни четлаб ўтишга йўл қўймаслик чораларини кўришини айтганди.