Қатарда фаолият юритаётган ҲАМАС раҳбарияти АҚШ таҳдиди ортидан Ироққа кўчиб ўтиши мумкин. Бу ҳақда Яқин Шарқ манбаларига таяниб, Тҳе National News хабар берди.
Манбада айтилишича, Вашингтон Қатар расмийлари орқали ҲАМАСга таъсир қилишга уринган. Шу йўл билан Исроил ва ҲАМАС ўртасида ўт очишни тўхтатишга эришиш, ҲАМАСни кўпроқ ён беришга мажбур қилиш мақсад қилинган.
ҲАМАС раҳбарияти бош идорани кўчириш ҳақида аллақачон қарор чиқарган. Ироқ расмийлари ҳам ўтган ойнинг ўзида ҲАМАС раҳбарларини мамлакатга киритишни маъқуллаган.
Манбаларнинг қўшимча қилишича, Эрон Бағдоддаги ҲАМАС етакчилари, идоралари ва ходимларини ҳимоя қилиш учун жавобгарликни бўйнига олган. Ушбу келишув ҲАМАС сиёсий бюроси раҳбари Исмоил Ҳания, Ироқ ва Эрон ҳукуматлари вакиллари томонидан анча олдин муҳокама қилинган ва якуний хулосага келинган.
Ироқ бош вазири Муҳаммад Шиа Ал Суданий Бағдоддаги ҳукумат ҲАМАСни қабул қилишга тайёрлигини билдирган. Бу тўғрисида Исмоил Ҳания билан шахсан келишув бўлгани айтилган.
“Ироқ сиёсий гуруҳлари ўртасида ҲАМАСнинг Бағдодга кўчиши бўйича келишув йўқ. Баъзилар, айниқса, курдлар ва суннийларнинг айрим гуруҳлари бу ҳодиса Қўшма Штатлар билан келишмовчиликларни чуқурлаштиришидан қўрқишади. Бироқ консенсус йўқлигига қарамай, ҳукуматнинг ҲАМАСни қабул қилиш қарори бекор қилинмайди”, — деган исми ошкор қилинмаган Ироқ олий ҳукумати расмийларидан бири.
ҲАМАС раҳбарлари ҳозирча ҳаракат идораси кўчирилиши санасини маълум қилмаган. Бағдоддаги янги бошқарма яқин ҳафталарда Муҳаммад ал-Ҳафий бошчилигида очилиши маълум қилинган.
Изоҳ (0)