Фаластин халқи яна бир оз сабр қилса, азоблар тез орада якунланади, дея Эрон ТИВ маълум қилди.
Вазирлик баёнотига кўра, Исроилнинг АҚШ ҳамда унинг иттифоқчилари кўмагида намоён бўлаётган фаластинликларга нисбатан қаттиққўллигидан глобал норозилик кучайиб бормоқда.
“Исроил режимининг минтақада ва дунёда нафас олиш майдони кундан кун тораймоқда, режимга қарши глобал норозилик кучаймоқда, Исроил жамияти ва унинг элитаси орасида умидсизлик чуқурлашиб бормоқда”, дейди Эрон ТИВ.
Баёнотда айтилишича, сионистик режимнинг АҚШ ва аксар Ғарб давлатларининг тўғридан тўғри ва тўлиқ қўллаб-қувватлаши билан содир бўлаётган ваҳшийлигининг ортиши “бу режимнинг парчаланиш таҳдиди олдида ваҳимага тушганидан далолатдир”.
“Фаластиннинг изтиробли, қайғули, аммо матонатли халқига ‘Озгина сабр қилсак, тонг отиши яқин’, деб айтилиши керак”, дейилади ҳужжатда.
Axios портали манбаларга таяниб хабар берганидек, Исроил разведка хизматлари Эрон яқин бир неча кун ичида Исроилга зарба бериши мумкинлигини тахмин қилмоқда.
“Исроил разведкасининг янги баҳосига кўра, Эрон ҲАМАС сиёсий бюроси раҳбари Исмоил Ҳаниянинг ўлдирилиши учун қасос сифатида Исроилга тўғридан тўғри ҳужум қилишга қарор қилди ва буни бир неча кун ичида, эҳтимол 15 августга белгиланган Ғазодаги гаровга олиш бўйича музокаралар олдидан ҳам амалга ошириши мумкин”, дея таъкидлаган нашр.
Аввалроқ АҚШ, Қатар ҳамда Миср етакчилари Исроил ва ҲАМАСни 15 август куни Ғазода ўт очишни тўхтатиш келишуви бўйича музокараларни қайта бошлашга чақирган эди. Исроил бош вазири Биньямин Нетаньяхунинг идораси музокараларда Исроил делегацияси иштирок этишини маълум қилган, бироқ ҲАМАС расмийлари иштирок этмаслигини айтган.
Изоҳ (0)