Қозоғистон президенти Қосим-Жўмарт Тўқаев Германия канцлери Олаф Шольц билан учрашувда Россия-Украина урушининг янада авж олиши “тузатиб бўлмайдиган оқибатларга” олиб келиши мумкинлигини айтди.
KazTAG агентлигининг қайд этишича, Тўқаев Шольцнинг илтимосига биноан уруш ҳақида ўз фикрини билдирган. У Россиянинг ҳарбий жиҳатдан енгилмас эканлигини “факт” деб атади.
“Урушнинг янада авж олиши бутун инсоният ва биринчи навбатда Россия-Украина можаросига бевосита алоқадор бўлган барча мамлакатлар учун тузатиб бўлмайдиган оқибатларга олиб келади. Афсуски, Истанбул битимини тузишдан бош тортиш билан ҳеч бўлмаганда сулҳга эришиш имконияти бой берилди. Аммо ҳали ҳам тинчликка эришиш мумкин”, деди Тўқаев.
Қозоғистон президентининг сўзларига кўра, турли давлатларнинг “барча тинчлик ташаббусларини” диққат билан кўриб чиқиш, шундан сўнг ҳарбий ҳаракатлар тўхтатилиши, кейин эса “ҳудудий масалалар” муҳокамасига ўтиш зарур. Тўқаев “давлатлар раҳбарлари лавозимга келиб-кетади, лекин халқлар, айниқса, қўшни халқлар тинч ва ўзаро ҳамжиҳатликда яшаши керак”лигини таъкидлади.
“Қозоғистон Россия билан дунёдаги энг узун қуруқлик чегарасига эга ва мамлакатларимиз ўртасида стратегик шериклик ва иттифоқчилик доирасидаги ҳамкорлик ривожланиб бормоқда. Қозоғистон, шунингдек, Украина халқига ва унинг ўзига хос маданиятига ҳурмат билан қарайди. Давлатларимиз ўртасида ҳеч қачон келишмовчилик бўлмаган. Киевда мамлакатимиз элчихонаси ўз фаолиятини давом эттирмоқда”, дея қўшимча қилган у.
Россия президенти Владимир Путин 14 июнь куни Украинада ҳарбий ҳаракатларни тўхтатиш ва тинчлик музокараларини бошлаш шартларини маълум қилган эди. Унга кўра, Украина Донецк, Луганск, Херсон ва Запорожье вилоятлари ҳудудидан қўшинларини тўлиқ олиб чиқиб кетиши ҳамда НАТОга қўшилиш режаларидан воз кечишини расман эълон қилиши керак. Бунга жавобан Зеленский буларни “олдинги хабарлардан фарқ қилмайдиган ультиматум хабарлар” деб атаган.
Изоҳ (0)