Украина ТИВ Қримнинг ҳудудий мақоми бўйича муросага йўл қўйиб бўлмаслигини маълум қилди, деб “Европа правда” нашри хабар берди.
Мурожаат Польша ТИВ раҳбари Радослав Сикорскининг БМТ мандати остида Қрим ярим оролида референдум ўтказишни таклиф қилган баёнотидан сўнг эълон қилинди.
Украина вазирлигининг таъкидлашича, мамлакатнинг ҳудудий яхлитлиги “ҳеч қачон муҳокама ёки муроса мавзуси бўлмаган ва бўлиши ҳам мумкин эмас”.
“Қрим Европа хавфсизлик архитектурасининг оғирлик марказидир, уни тўлиқ тиклаш фақат Украинанинг бутун ҳудуди, жумладан, Украина яримороли тўлиқ қайтарилганидан кейингина мумкин”, дейилади вазирлик баёнотида.
Украина ТИВ Россияни Қримдан қўшинларини олиб чиқишга мажбурлаш ва жиноятлар учун жавобгарликка тортишда қўллаб-қувватлашга умид билдирган.
Польша ташқи ишлар вазирлиги раҳбари Радослав Сикорский Киевга ташрифи чоғида Россия ва Украина урушни тугатмай туриб Қримнинг мақоми бўйича келишувга эриша олмаслигини айтган эди.
“Қрим Россия ва айниқса мамлакат президенти Владимир Путин учун рамзий, аммо Украина учун стратегик аҳамиятга эга. Биз уни БМТ мандати остида, қонуний резидент кимлигини текширгандан сўнг, адолатли референдум тайёрлаш миссияси билан топширишимиз мумкин”, дея тушунтирган Сикорский.
У мазкур жараён 20 йилга кечиктирилиши мумкинлигини қўшимча қилган. Шу билан бирга, у Ғарб аннексия қилинганидан кейин “украиналикларга Қримда жанг қилмасликни айтиб” хатога йўл қўйганини маълум қилган.
Россия Қримни ўн йил аввал, 2014 йил баҳорида, референдум натижаларига кўра аннексия қилган эди. Украина, АҚШ, Хитой ва дунёнинг бошқа аксарият давлатларида овоз бериш натижалари тан олинмаган. Путин яриморолнинг ҳудудий мансублиги масаласини ёпиқ деб атаган. 2014 йилда у Қрим Россия учун муқаддас жой эканини таъкидлаган ҳамда ҳудудни “барча имкониятлар билан” ҳимоя қилишга ваъда берган.
2022 йил август ойида Украина президенти Владимир Зеленский Киев Қримни “ўзи тўғри деб билган ҳар қандай йўл билан” қайтаришга ваъда берган. Унинг сўзларига кўра, бу “глобал қонун ва тартибни қайта тиклаш бўлади”.
Изоҳ (0)