Ички ишлар вазирининг тегишли буйруғи билан Андижон вилоят Йўл ҳаракати хавфсизлиги бошқармаси бошлиғи лавозимига подполковник Рустам Мақсудхўжаев тайинланган. Бу ҳақда вилоят ИИБ ахборот хизмати хабар бермоқда.
Қайд этилишича, янги раҳбарни жамоага таништириш маросимида вилоят автомобиль йўлларида содир бўлган йўл-транспорт ҳодисаларининг сабаб ва омиллари, масъуллар томонидан йўл қўйилган хато ва камчиликлар танқидий тарзда муҳокама қилинган.
Рустам Мақсудхўжаевгача бошқармага раҳбарлик қилган Абдунаби Носиров қачон ишдан кетгани ҳақида маълумот берилмаган.
Андижон вилоят ЙҲХ бошқармаси ахборот хизматининг “Дарё”га маълум қилишича, Абдунаби Носиров магистратурага ўқишга киргани учун лавозимидан бўшатилган.
Аввалроқ Абдунаби Носиров Андижон шаҳридаги мактаблар олдида қизил чироқда ўтган ва пиёдаларга йўл бермаган ҳайдовчилар ўша мактабларда ўтказилган йиғилишлар вақтида ўқувчи ва ўқитувчилар олдида изза қилингани ҳақида хабар берилган эди.
“Битта тажриба қилдик: мактаб яқинидаги светофор олдига ходим қўйдим. Қизил чироқдан ўтган ҳайдовчини эрталаб мактаб ўқувчиларининг умумий йиғилишига олиб боридим-да, ҳамма болаларни чақириб, ‘Мана, кеча қизил чироқда ўтган ифлос ҳайдовчи, мана шуни қарғанглар’, деб ўқитувчилар билан ижтимоий тармоқларга ҳам чиқардим. Қизилда ўтганнинг 2-3 тасини олиб, эрталаб мактаб ўқувчиларининг умумий йиғилишига олиб бораман. Ўзим эринмасдан бораман. Шундай қилиб олиб чиқдик — камайди”, деган эди Абдунаби Носиров.
Ички ишлар вазирлиги Абдунаби Носировнинг хатти-ҳаракатлари бўйича изоҳ бермаган.
Изоҳ (0)