Ўзбекистонда айрим талабаларга контракт суммасининг бир қисми тўлаб берилади

Ўзбекистонда “ёшлар дафтари”га киритилган талабаларнинг 16,5 миллион сўмгача бўлган тўлов-контракт пуллари тўлаб берилади. Бу ҳақда Вазирлар Маҳкамасининг 2022 йил 6 июндаги 312-сонли қарорида белгиланган.

Унга кўра, қуйидаги тоифаларга тўлаб берилиши назарда тутилган:

• “темир дафтар”га киритилган оила фарзанди;
• “аёллар дафтари”га киритилган аёллар фарзанди;
• Ижтимоий ҳимоя ягона реестри АТга киритилган оиланинг профессионал ёки ОТМ да таълим олаётган фарзанди;
• Меҳрибонлик уйи ёки Болалар шаҳарчасида тарбияланган ўқувчи-талаба;
• ота-она қарамоғидан маҳрум бўлган, васийликка олинган кам таъминлаган ўқувчи-талаба;
• оила аъзоларининг камида биттаси I гуруҳ ёки ҳар иккиси II гуруҳ ногиронлиги бўлган кам таъминлаган оиланинг профессионал ёки ОТМда таълим олаётган фарзанди;
• ногиронлиги ёки саломатлигида нуқсони бўлган ўқувчи-талаба;
• оиласи кам таъминланган талабага.

Республикадаги профессионал таълим ташкилотларида таълим олаётган, шунингдек, Ўзбекистонда фаолият олиб бораётган давлат, нодавлат олий таълим ташкилотлари ва хорижий олий таълим ташкилотларининг филиалларида:

• бакалавриатнинг кундузги, сиртқи ва кечки шаклида;
• магистратуранинг кундузги йўналишида таълим олаётган талабаларга тўлов-контракт асосида ўқиш бўйича йиллик харажатларининг бир қисми тўлаб берилади.

Ушбу харажатларни тўлаб бериш ёшлар етакчисининг ижобий тавсияси асосида тўлов-контрактининг 50 фоизигача, бироқ БҲМнинг 50 баравари (16 миллион 500 минг сўм)дан ошмаган миқдорда амалга оширилади.

Тўлов-контракт харажатларининг бир қисмини қоплаб бериш қуйидаги тоифаларларга амал қилмайди:

• иккинчи ва ундан кейинги мутахассислик;
• қўшма таълим дастурлари;
• табақалаштирилган тўлов-контракт асосида таълим олаётганларга нисбатан татбиқ.

Талабалар тўлов-контракт харажатларининг бир қисмини тўлаб беришни сўраб Васийлик кенгашига тўлов-контракт асосида ўқиш ҳақида белгиланган тартибда расмийлаштирилган шартнома (контракт) нусхасини тақдим этиши лозим. Васийлик кенгаши уч иш куни ичида мурожаатни унга илова қилинган ҳужжатлар билан бирга ариза берувчи яшаб келаётган маҳалладаги ёшлар етакчисига кўриб чиқиш учун юборади.

Маҳалладаги ёшлар етакчиси беш иш куни ичида тўлов-контракт харажатларини қоплаш ҳақидаги тавсиянома ёки рад этиш тўғрисидаги хабарномани Васийлик кенгашига юборади. Бунда тўлов-контракт харажатларини қоплашни рад этиш ҳақида хабарнома юборилганда рад этиш сабаблари асосланиши талаб этилади.

Агар маҳалладаги ёшлар етакчиси мурожаатни унга тушган пайтдан бошлаб беш иш куни ичида кўриб чиқмаса ёки субсидия ажратишни асоссиз рад этиш ҳақида хабарнома берса, ариза берувчининг мурожаати ушбу параграф талабларига мувофиқ бўлганда Васийлик кенгаши унинг мурожаатини қаноатлантириш ҳуқуқига эга бўлади.

Мурожаатни ўрганиш натижалари бўйича Васийлик кенгаши томонидан тўлов-контракт харажатларини қоплаш ҳақида қарор қабул қилингандан сўнг уч иш куни ичида белгиланган миқдордаги тўлов-контракт маблағлари профессионал таълим ёки олий таълим ташкилотининг ҳисоб рақамига ўтказиб берилади.