Эрон президенти Масъуд Пезешкиён BRICS саммитининг кенгайтирилган таркибдаги йиғилишида ассоциацияга аъзо мамлакатларни АҚШ долларидан мустақил бўлган тижорат бўйича ҳисоб-китоб тизимини яратишга чақирди. Бу ҳақда “ТАСС” хабар бермоқда.
“Биз жаҳон иқтисодиётида доллар ҳукмронлигини камайтиришга қаратилган саъй-ҳаракатларни кучайтиришимиз керак. BRICS гуруҳини доллардан мустақил янги ҳисоб-китоб механизмини яратиш бўйича оператив қарорлар қабул қилишга чақираман”, деди Пезешкиён.
Россия президенти Владимир Путин эса BRICS саммитидаги чиқишида доллар қурол сифатида ишлатилаётганини таъкидлади.
“Бугунги кунда доллар қурол сифатида ишлатилмоқда. Бу мазкур ишни қилаётганларнинг катта хатоси.
Доллардан қурол сифатида фойдаланиш валютага бўлган ишончни сусайтиради. Биз долларга қарши курашаётганимиз йўқ, лекин ундан фойдаланишга рухсат берилмаса, биз бошқа муқобил вариантни излашимизга тўғри келади”, деди Россия президенти.
Изоҳ (0)