16 майга ўтар кечаси Исроил мудофаа армияси Ғазо секторида ҲАМАС ҳаракатининг сиёсий бюроси етакчиси Яҳё Синварнинг уйига ракета зарбаси берди, деб ёзади Meduza армия хабарига таяниб.
Унга кўра, уйдан ҳарбий база сифатида фойдаланилган. Ҳужум оқибатида бино вайрон бўлган. Жабрланганлар ҳақида маълумот йўқ. «Гаарец» нашрининг ёзишича, ҳужум чоғида Синвар уйида бўлмаган.
Аввалроқ Исроил армияси Ғазо секторида ҲАМАСнинг бошқа раҳбарларига, хусусан, ҲАМАС сиёсий бюроси раҳбари ўринбосари Халил ал-Хаий ва «Ал-Фаркаин» батальони қўмондони Ҳолид Манамарага тегишли уйларга ҳужум қилган эди. Бундан ташқари, Исроил Мудофаа армияси ҲАМАС ҳарбий разведкасининг иккита асосий ходими — хавфсизлик бўлими бошлиғи Ҳасан Каужий ва унинг ўринбосари Воил Исо ўлдирилгани ҳақида хабар берганди.
Бор-йўғи 24 соат ичида Исроил армияси ҲАМАСнинг 90 дан ортиқ ҳарбий объектларига зарбалар берди. ҲАМАС ҳам ўз навбатида Исроилни ўққа тутишни давом эттириб, мамлакат ҳудудига 120 дан ортиқ ракета отди.
Шунингдек, 15 май куни Исроил кучлари Ғазода ҲАМАС ҳарбий разведкаси фойдаланган кўп қаватли бинони вайрон қилди, у ерда Al Jazeera телеканали ва Associated Press агентлиги каби ОАВларнинг идоралари ҳам жойлашган эди.
Фаластин-Исроил низосининг 2014 йилдан буён кузатилган энг кучли авж олиши май ойида Исроил ҳукуматининг Қуддусда бир қатор араб оилаларини кўчириб юбориш қароридан кейин бошланди. Бу норозиликларни келтириб чиқарди ҳамда Қуддусда араб намойишчилар ва Исроил полицияси ўртасидаги тўқнашувларга сабаб бўлди.
Вазиятга ҲАМАС аралашди. Исроил унинг полицияни олиб кетиш ҳақидаги талабларини бажармаганидан кейин, гуруҳ ракеталар отишни бошлади. Бунга жавобан Исроил Ғазо секторини ўққа тутди.
Reuters маълумотларига кўра, шу пайтгача Ғазода камида 149 киши , шу жумладан, 41 нафар ёш бола; Исроилда 10 киши, жумладан, икки нафар ёш бола ҳалок бўлган.
Изоҳ (0)