Жиззах вилоятининг Пахтакор туманидаги мактабда 4 март куни ўқитувчиси танбеҳ берган 1-синф ўқувчиси ҳушидан кетгани ҳақида хабар берилган эди. ЎзА ҳолат юзасидан ўрганиш ўтказди.
Пахтакор туманидаги 9-сонли умумий мактаб директори Нурали Сулаймоновнинг айтишича, 1-“Б” синф раҳбари тажрибали, 58 ёшли педагог синф ўқувчиларидан диктант олгач, аъло ва яхши баҳо олган ўқувчиларни рағбатлантирган.
Сўнгра қониқарсиз баҳо олган ўқувчиларни ёнига чиқариб, уларга танбеҳ берган ва қўлидаги чўп билан ўқувчиларнинг қўлларига уради. Ўқитувчи иккинчи қаторда турган ўқувчининг ҳам қўлига уради ва ундан узоқлашгач, ўқувчи ҳушини йўқотиб йиқилади. Ўқитувчининг бу ҳаракати педагогикага мутлақо зид. Мактаб низомининг 13 ва 14-бандларида белгиланган меъёрларга кўра, боланинг шахсиятига тегиш, зўравонлик қилиш, тенгдошлари олдида изза қилиш, калтаклаш умуман тақиқланади. Бу ҳолатни мактаб жамоаси билан муҳокама қилиб, ўқитувчига нисбатан интизомий чора кўришга қарор қилинди, – дейди мактаб директори.
Ўқувчининг бувиси воқеа содир бўлган куни набираси уйга ияги йиртилган, оғзи қон, қўрқувдан ранги оқариб кетган ҳолда кириб келганини айтди.
Синф раҳбарига қўнғироқ қилиб, нима сабабдан набирамнинг ияги йиртилиб, оғзи қонаганини сўрадим. Устози диктант олганини, набирам паст баҳо олгани учун жазолаганини айтди. Турмуш ўртоғим билан биргаликда мактаб директорига келдик. Бўлган воқеани тушунтириб, видеоёзувни кўрсатишини сўрадик.
Тасвирни кузатиб, шунга амин бўлдимки, бола ҳушини йўқотиб йиқилгандан кейин унга устози биринчи ёрдам кўрсатмаган, мактаб ҳамширасини ҳам чақирмаган. Бундан маъмуриятни хабардор қилмаган. Бир соат ўқигач, набирамнинг ёлғиз ўзини уйга жўнатиб юборган. Набирам аввал, 2-3 ёшларида ҳам қўрққан пайтида ҳушидан кетиб, йиқилиб тушиш ҳолати бўлган. Шу сабаб синф раҳбарига буни айтиб, уни уришиш, унга тазйиқ ўтказиш, қўрқитиш, уриш мумкин эмаслигини, ҳатто, унинг олдида бир-биримизга қаттиқ ҳам гапирмаслигимизни тайинлаган эдим.
Набирамдан уйга бориб сўраганимда, устозидан жуда ҳам қўрқиб кетганини айтди. Ҳозир набирамнинг ҳолати яхши. Ўқувчи бувисининг гапларига эътибор берган бўлсангиз, боланинг ҳушидан кетиб йиқилиш ҳолати шу пайтгача ҳам 2 маротаба содир бўлган.
Ўқувчининг ота-онаси ўзаро келиша олмагач ажрашган ва онаси Қозоғистоннинг Чимкент вилоятига турмушга чиқиб кетган. Гарчанд биз мактабга борган кунимиз онаси Қозоғистондан келган ва боласини ўзи билан олиб кетмоқчи бўлган. Болага буларнинг барчаси кучли руҳий зарба бўлган, – дейди ўқувчининг бувиси.
Жиззах вилоят прокурорининг катта ёрдамчиси Муҳаббат Ўразалиевага кўра, Пахтакор туман ички ишлар органи мутасадди ходимлари томонидан терговга қадар текширув ҳаракатлари ўтказилмоқда. Текширув ҳаракатлари Жиззах вилояти прокуратураси томонидан назоратга олинган.
Изоҳ (0)