Европа Иттифоқи ва Исроил вакиллари сўнгги ўн йил ичида биринчи марта олий даражадаги музокараларни олиб борди. Бу ҳақда Deutsche Welle хабар берди.
Европа Иттифоқи 2012 йилдан бери Исроил билан биринчи «Ассоциация кенгаши» йиғилишини ўтказди. Иттифоқнинг ташқи ишлар ва хавфсизлик сиёсати бўйича олий вакили Жозеп Боррел Исроил бош вазири Яир Лапиднинг БМТ Бош ассамблеясидаги нутқини қўллаб-қувватлашини билдирди, унда Исроил раҳбари «икки халқ учун икки давлат асосида фаластинликлар билан келишишга чақирган».
«Биз ўзаро хавотиримизга сабаб бўлаётган айрим масалаларни очиқ муҳокама қиламиз. Мен Фаластин ҳудудларидаги вазият ҳамда ҳозирда тўхтаб қолган Яқин Шарқ тинчлик жараёни ҳақида гапиряпман», — деган ЕИ бош дипломати учрашув бошида.
Боррел БМТнинг Фаластин ҳудудларидаги вазият ҳақидаги ҳисоботи ташвишли эканини айтди. Ҳисоботга кўра, бу йил ҳалок бўлган фаластинликлар сони 2007 йилдан бери энг юқори кўрсаткичга етган.
Шунингдек, Исроил ва ЕИ Эрон билан 2015 йилда имзоланган ядровий келишувни қайта тиклашга уринишлар бўйича турли фикрда экани қайд этилди.
Аввалроқ Туркия президенти Ражаб Тоййиб Эрдўғон ва Исроил бош вазири Яир Лапид 2008 йилдан бери илк бор БМТ Бош ассамблеяси доирасида музокара ўтказган эди.
Изоҳ (0)