Франция президенти Эммануэл Макрон вазирлар кенгашининг ёпиқ мажлисида Исроил бош вазири Биньямин Нетаньяху яҳудий давлатининг БМТ резолюцияси асосида ташкил этилганини ёдда тутиши кераклигини таъкидлади. Бу ҳақда ўз манбаларига таяниб, Le Parisien газетаси хабар берди.
“Нетаньяху ўз давлати БМТ резолюцияси билан ташкил этилганини унутмаслиги лозим, шунинг учун у ташкилот қарорларига қарши чиқмаслиги керак”, деган Макрон.
Сиёсатчи 1947 йил ноябрь ойида БМТ Бош ассамблеясининг Фаластиндаги Британия мандатини бекор қилган ва бу ҳудудни яҳудий ҳамда араб давлатларига бўлган овоз беришига ишора қилди.
Макрон ушбу баёнотни Исроилнинг Ливандаги БМТ тинчликпарвар кучлари жойлашган ҳудудларда “Ҳизбуллоҳ”га қарши олиб бораётган ҳарбий операциялари ҳамда тинчликпарвар кучларга ҳужумлар учун Исроил элчисининг Франция Ташқи ишлар вазирлигига чақирилиши фонида берган.
Нетаньяхунинг Макрон билан 15 октябрдаги телефон орқали суҳбатидан сўнг, Исроил Бош вазири матбуот хизмати “Франция президентига эслатма” сарлавҳали баёнот тарқатди. Унда қуйидагилар таъкидланади:
“Исроил давлати БМТ резолюцияси натижасида эмас, балки мустақиллик учун урушда эришилган ғалаба туфайли, кўпчилиги Холокостни бошдан кечирган ёки Франциядаги Виши режимидан қочиб қутулган мард жангчиларнинг қони эвазига қозонилган. Шуни эсда тутиш лозимки, сўнгги ўн йилликлар давомида БМТ ягона яҳудий давлатини мавжудлик ҳуқуқидан маҳрум этиш ва ўзини ҳимоя қилиш қобилиятини йўқотиш мақсадида Исроил давлатига қарши йўналтирилган юзлаб антисемистик қарорларни қабул қилган”.
Изоҳ (0)