Ўзбекистон, Қирғизистон ва Қозоғистон энергетика ва сув хўжаликлари вазирларининг навбатдаги учрашуви бўлиб ўтди, деб хабар бермоқда Ўзбекистон Энергетика вазирлиги матбуот хизмати.
Маълум қилинишича, 12 октябрь куни бўлиб ўтган учрашувда Ўзбекистон энергетика вазири Жўрабек Мирзамаҳмудов, Ўзбекистон сув хўжалиги вазири Шавкат Хамраев, Қозоғистон энергетика вазири Алмасадам Саткалиев, Қозоғистон сув хўжалиги ва ирригация вазири Нуржон Нуржигитов ва Қирғизистон энергетика вазири Таалайбек Ибраев ҳамда бошқа мутасадди раҳбарлар иштирок этди. Шунингдек, Озарбайжон энергетика вазири ўринбосари К.Аббосов меҳмон сифатида қатнашди.
Учрашувда мамлакатлар сув-энергетика тизимининг куз-қиш мавсумида барқарор ишлашини таъминлаш масалалари муҳокама қилинди ва тармоқлар иш режимларининг графиклари келишилди.
Мазкур тадбирда томонлар ўртасида ҳамкорликда амалга оширилаётган лойиҳалар, хусусан, Қамбарота ГЭС-1 қурилиши лойиҳасининг ҳозирги ҳолати ҳамда сув-энергетика балансини мувофиқлаштириш масалалари кўриб чиқилди.
Шу билан бирга, учрашувда Хитойнинг CEEC компанияси вакиллари билан Қирғизистоннинг Жалолобод вилоятида “Чотқол” ГЭС қурилиши юзасидан ўтказилган дастлабки ўрганишлар ва келгусидаги режалар муҳокама қилинди.
Учрашув сўнгида томонлар ўртасида доимий ишчи гуруҳ йиғилишларини ўтказиб туриш ва лойиҳаларни амалга ошириш юзасидан “йўл харитаси”ни имзолаш таклиф этилди ҳамда тегишли ҳужжатлар имзоланди.
Изоҳ (0)