Ўзбекистон транспорт вазири Илҳом Маҳкамов Остона шаҳрида Қозоғистон транспорт вазири Марат Карабаев билан ишчи учрашуви ўтказди. Бу ҳақда вазирлик матбуот хизмати хабар берди.
-yj3Zf85z.jpg)
Қайд этилишича, учрашувда томонлар ҳамкорликнинг асосий йўналишлари, халқаро транспорт коридорларини ривожлантириш, темир йўл ва автомобиль транспорти, транспорт инфратузилмасини қуриш йўналишида ўзаро ҳамкорликда қўшма лойиҳаларни амалга ошириш масалаларини муҳокама қилди.
Хусусан, Ўзбекистон—Афғонистон—Покистон темир йўл қурилиши лойиҳасини ҳамкорликда амалга ошириш, Беларусь—Россия—Қозоғистон—Ўзбекистон—Афғонистон—Покистон мультимодал транспорт коридорини биргаликда ривожлантириш ва юк ташиш ҳужжатларини рақамлаштириш орқали ташувларни янада тезлаштириш билан боғлиқ жиҳатлар кўриб чиқилди.
Термиз—Мозори-Шариф—Қобул—Пешовар темир йўли қурилиши борасида Қозоғистон томони Ўзбекистон ташаббусини қўллаб-қувватлашини маълум қилди.
“Ишончим комилки, лойиҳанинг амалга оширилиши Марказий Осиё мамлакатлари учун минтақавий коммуникациялар ва савдони ривожлантиришга хизмат қилади, чунки Жанубий Осиё минтақасининг йирик денгиз портларига чиқиш йўллари очилади”, — деган Қозоғистон транспорт вазири Марат Карабаев.
Фуқаро авиацияси транспорт-логистика марказининг асосий ҳаракатлантирувчи кучи ҳисобланади. Kazinform’нинг ёзишича, ҳозирда Қозоғистон ва Ўзбекистон шаҳарлари ўртасида ҳафтасига 37 та рейс амалга оширилмоқда.
Ўтган йили Тошкентда Қозоғистон ва Ўзбекистон авиация маъмуриятлари ўртасида музокаралар бўлиб ўтган эди.
Музокаралар чоғида рейслар сонини янада ошириш ва парвозлар географиясини кенгайтириш, Остона—Тошкент йўналиши бўйича рухсат этилган рейслар сонини ҳафтасига 12 тадан 36 тага, Олмаота—Тошкент йўналиши бўйича ҳафтасига 20 тадан 36 та рейсга кўпайтириш, бошқа йўналишларда эса ҳафтасига 4 тагача рейсни оширишга келишиб олди.
Учрашув якунларига кўра, томонлар Қозоғистон ва Ўзбекистон ўртасида 2024—2025 йилларда транспорт ва логистика соҳасидаги стратегик ҳамкорликни ривожлантириш бўйича “Йўл харитаси”ни имзолади.
Изоҳ (0)