Энергетика вазири Ўзбекистон барча нефть ва газ конларига тегишли эксклюзив ҳуқуқни Россияга берганини рад этди

Ўзбекистон энергетика вазири Жўрабек Мирзамаҳмудов бир гуруҳ журналист ва блогерлар билан учрашиб, энергетика соҳасидаги муаммоларни муҳокама қилди.

Учрашувда блогер Хушнуд Худойбердиев вазирга “Ўзбекистон барча газ ва нефтга нисбатан эксклюзив ҳуқуқни Россияга қарашли компанияга 35 йилга бердими ёки йўқми?” дея савол берди.

Вазирнинг таъкидлашича, бу ёлғон, мутлақо асоссиз ва нотўғри талқин қилинган маълумот. Барча эксплутациядаги конларнинг аксарияти “Ўзбекнефтгаз”га тегишли. 35 йиллик шартнома тўғрисидаги ахборотлар фақатгина “Мустақилликнинг 25 йиллиги” номли конини ўзлаштириш ва ишлатишга тегишли.

“Сурхондарё вилоятининг Бойсун тумани ҳудудида, агар Ўзбекистонда ҳозир 250 дан ортиқ нефть ва газ конлари мавжуд бўлса, у шу конларнинг биттаси. Имзоланган битимга асосан, конни ўзлаштиришга оид барча харажатлар давлат кафолати ёки бюджет маблағлари ҳисобидан эмас, тўлиқ инвесторлар ҳисобидан амалга оширяпти. Фойданинг 50 фоизи инвесторга, 50 фоизи давлатга тегишли бўлади. Қонунчиликда ушбу келишув Маҳсулотни тақсимлаш битими дейилади. Ҳамкорлар, хорижий инвесторлар билан фақат битта кон бўйича имзоланади. Мана, атай шу битимни олдим. Кўрсангиз, ҳар бир варағи ишчи гуруҳ, инвесторлар, халқаро юристлар жалб қилинган ҳолда тайёрланган. Бу қандайдир бир кечада пайдо бўлган ҳужжат эмас, тизимли, қонунчилик асосида халқаро нормалар бўйича мажбуриятлар белгиланган келишув. Битимда берилган ҳуқуқлар фақатгина келишув муддати давомида ва айнан шартномада кўрсатилган ҳудудга амал қилиши ёзилган. Муддат — 35 йил. Нимага 35 йил деган савол бўлиши мумкин. Сабаби — “Мустақилликнинг 25 йиллиги” конида (аввалги номи Гаджак) геология-қидирув ишларининг ўзига камида 8 йил кетади”, — дейди вазир.

Унинг таъкидлашича, битимда инвесторга берилган ҳуқуқ белгиланган муддатда шартномадаги майдонда ишларни амалга ошириши белгиланган. Шартнома ҳудуди — битта кон ва унинг атрофидаги ҳудуд. Яъни, инвесторга битта ҳудуддаги конни ўз маблағлари ҳисобидан 35 йил давомида ўзлаштириш ҳуқуқи берилган. Битимга имзо чекиш — Ўзбекистон номидан бўлгани учун бош вазир ўринбосарига бу ваколат берилган.

Мавзуга доир:

• Ўзбекистонга Россия газини Қозоғистон орқали етказиб бериш масаласи муҳокама қилинди
• Ўзбекистон ва “Газпром” ўртасида ҳамкорлик бўйича йўл харитасининг суверенитетга таҳдиди йўқлиги маълум қилинди
• Жамоатчилик “Газпром” ва Ўзбекистон ўртасида имзоланган “Йўл харитаси” ҳақидаги хабар эълон қилинишини бир кун кутди