1977 йилда режиссёр Элдар Рязановнинг “Ишдаги ишқ” трагикомедиясининг премьераси бўлиб ўтган. Мазкур фильм 1978 йилда фильмлар прокатида етакчилик қилди, лойиҳани Совет Иттифоқида 58 миллиондан ортиқ инсон томоша қилган. Фильмда Москва статистика муассасаси ходимлари ва уларнинг иш фаолиятидаги қизиқарли воқеалар ёритилган. Қуйида ушбу классик фильмнинг томошабинлар эътиборига тушган бир нечта хатоликларни кўриб ўтамиз.
Галстук
Актёр Олег Басилашвили ижро этган қаҳрамоннинг ташқи кўриниши тез-тез ўзгариб туради: аввалига Самохвалов Калугина билан танишиш учун унинг хонасига кириб келганида эркакнинг галстуги кўк ва олов ранг тусда бўлади.
Кейин у дўстлари Новоселцев ва Рижова билан танаффусга чиқади, у ерда қаҳрамоннинг галстуги олов ранг ва кумуш рангга ўзгаради. Самохвалов раҳбарнинг кабинетига қайтганида, аксессуар аввалги рангига қайтади.
Гап шундаки, бу икки саҳна турли вақтларда суратга олинган, шунинг учун актёрнинг галстуги бошқача боғланган.
Пиджак
Сюжетга кўра, айни пайтда қаҳрамон Людмила Калугина (Алиса Фрейндлих) котиба Верочка (Лия Ахеджакова) ёрдамида чиройли қадам ташлашни ўрганаётган бўлди.
Хонага нотаниш одамлар кириб келганда, Калугина шошилиб жигарранг пиджагини кияди, лекин тугмаларни қадашга улгурмайди.
Сўнг Калугина тугмаси ёпиқ кийимда Новоселцев билан суҳбатлашган кадр пайдо бўлади. Новоселцев от ҳайкалини столга қўйиш вақтида йиқилиб тушади. Шу вақт Калугина пиджак тугмалари қадалмаган ҳолда унга ёрдам беради.
Девордаги доғлар
Фильмнинг финал қисмида Калугина ва Новоселцев жанжаллашиб қолади, эркак раҳбарини “мымра” (қари қиз, зерикарли ва хомуш аёл дегани) дея ҳақоратлайди. Бундан ғазабланган Калугина унинг юзига бир стакан сув сепиб юборади. Хона деворларига ҳам сув сачрайди.
Бир неча сониядан сўнг, қаҳрамонлар офис атрофида бир-бирларини қувганда, деворда кичик томчилар кўринади. Яна бир дақиқадан кейин, деворда аввалгидек катта доғлар “пайдо бўлиб қолади”.
Режиссёр Элдар Рязановнинг “Ишдаги ишқ” фильми 1977 йили Мосфильм томонидан суратга олинган. Мана деярли ярим асрдан буён ушбу комедия кўплаб томошабинлар кўнглини забт этиб келмоқда. Фильм Элдар Рязановнинг Эмил Брагинский билан бирга театр учун ёзган “Ҳамкасблар” номли қиссаси асосида суратга олинган ва 1979 йил РСФСР Давлат мукофоти билан тақдирланган.
Фильмда Москвадаги статистика қўмитасининг турмушга чиқмаган раҳбари Людмила Калугина ва унинг қўл остида ишловчи иқтисодчи ходим Анатолий Новоселцевнинг нафрат билан бошланган муносабатларининг севгига айланиши кўрсатиб берилган.
Изоҳ (0)