1977-yilda rejissyor Eldar Ryazanovning “Ishdagi ishq” tragikomediyasining premyerasi bo‘lib o‘tgan. Mazkur film 1978-yilda filmlar prokatida yetakchilik qildi, loyihani Sovet Ittifoqida 58 milliondan ortiq inson tomosha qilgan. Filmda Moskva statistika muassasasi xodimlari va ularning ish faoliyatidagi qiziqarli voqealar yoritilgan. Quyida ushbu klassik filmning tomoshabinlar e’tiboriga tushgan bir nechta xatoliklarni ko‘rib o‘tamiz.
Galstuk
Aktyor Oleg Basilashvili ijro etgan qahramonning tashqi ko‘rinishi tez-tez o‘zgarib turadi: avvaliga Samoxvalov Kalugina bilan tanishish uchun uning xonasiga kirib kelganida erkakning galstugi ko‘k va olov rang tusda bo‘ladi.
Keyin u do‘stlari Novoseltsev va Rijova bilan tanaffusga chiqadi, u yerda qahramonning galstugi olov rang va kumush rangga o‘zgaradi. Samoxvalov rahbarning kabinetiga qaytganida, aksessuar avvalgi rangiga qaytadi.
Gap shundaki, bu ikki sahna turli vaqtlarda suratga olingan, shuning uchun aktyorning galstugi boshqacha bog‘langan.
Pidjak
Syujetga ko‘ra, ayni paytda qahramon Lyudmila Kalugina (Alisa Freyndlix) kotiba Verochka (Liya Axedjakova) yordamida chiroyli qadam tashlashni o‘rganayotgan bo‘ldi.
Xonaga notanish odamlar kirib kelganda, Kalugina shoshilib jigarrang pidjagini kiyadi, lekin tugmalarni qadashga ulgurmaydi.
So‘ng Kalugina tugmasi yopiq kiyimda Novoseltsev bilan suhbatlashgan kadr paydo bo‘ladi. Novoseltsev ot haykalini stolga qo‘yish vaqtida yiqilib tushadi. Shu vaqt Kalugina pidjak tugmalari qadalmagan holda unga yordam beradi.
Devordagi dog‘lar
Filmning final qismida Kalugina va Novoseltsev janjallashib qoladi, erkak rahbarini “мымра” (qari qiz, zerikarli va xomush ayol degani) deya haqoratlaydi. Bundan g‘azablangan Kalugina uning yuziga bir stakan suv sepib yuboradi. Xona devorlariga ham suv sachraydi.
Bir necha soniyadan so‘ng, qahramonlar ofis atrofida bir-birlarini quvganda, devorda kichik tomchilar ko‘rinadi. Yana bir daqiqadan keyin, devorda avvalgidek katta dog‘lar “paydo bo‘lib qoladi”.
Rejissyor Eldar Ryazanovning “Ishdagi ishq” filmi 1977-yili Mosfilm tomonidan suratga olingan. Mana deyarli yarim asrdan buyon ushbu komediya ko‘plab tomoshabinlar ko‘nglini zabt etib kelmoqda. Film Eldar Ryazanovning Emil Braginskiy bilan birga teatr uchun yozgan “Hamkasblar” nomli qissasi asosida suratga olingan va 1979-yil RSFSR Davlat mukofoti bilan taqdirlangan.
Filmda Moskvadagi statistika qo‘mitasining turmushga chiqmagan rahbari Lyudmila Kalugina va uning qo‘l ostida ishlovchi iqtisodchi xodim Anatoliy Novoseltsevning nafrat bilan boshlangan munosabatlarining sevgiga aylanishi ko‘rsatib berilgan.
Izoh (0)