Турк сериалларининг сюжети, актёрлар маҳорати ҳар қандай томошабин эътиборини ўзига қаратади. Улардаги воқеалар ривожи, ҳақиқийдек тасвирланган туйғулар, муносабатлар ҳам алоҳида эътирофга лойиқ. Туркия давлати ҳозирга келиб АҚШдан кейинги энг кўп сериал сотувчи иккинчи мамлакатга айланган. Аммо кўпгина турк юлдузларининг келиб чиқиши тўлиқ турк миллатига мансуб эмас. Балки шунинг учун сериаллардаги барча қаҳрамонлар ноёб гўзаллик соҳибидир?
Мерем Узерли
Хуррам образи билан танилган латофатли Мерем Узерли 1983 йил 12 августда Германиянинг Кассел шаҳрида туғилган. Унинг онаси Урсула немис, отаси Ҳусайн эса турк. У оиладаги тўртинчи ва кенжа фарзанд. Фарзандида санъатга бўлган қизиқишни кўрган онаси Меремни театр тўгарагига олиб борди. Сўнг у Гамбургдаги Фресе драма студиясида актёрлик йўналишида таҳсил олди, у ерда кичик театр спектаклларида ҳам рол ўйнади. 2008 йилдан у эпизодик роллар билан немис фильмлари ва телесериалларида суратга туша бошлади.
Фаҳрие Эвжен
Актриса 1986 йил 4 июнда туғилган. Ота-онаси Ҳадиче ва Рамазан Эвжен Германиянинг ғарбида жойлашган Золлинген шаҳрида яшаган. Онаси — черкас, отаси эса Салоники шаҳридан қочган турк муҳожири эди. Кавказ ва турк генлари Фаҳрие гўзаллигида намоён бўлгани туфайли у Истанбулдаги киносаноати вакиллари эътиборига тасодифан тушган. Кейинчалик у “Тўкилган япроқлар”, “Курт Сейит ва Александра”, “Чолиқуши” ва “Севги сенга ўхшайди” лойиҳаларида суратга тушган.
Алина Боз
Турк киносаноатида куртак очаётган ёш актриса Алина Боз Москва шаҳрида туғилган. Унинг онаси рус, отаси турк. 7 ёшигача Россияда яшаган ва кейинчалик оиласи билан Истанбулга кўчиб келган. Актриса рус ва турк тилларида равон сўзлашади. Болалигида у учувчи бўлишни истаган ва авиация мутахассислигига ўқишга кирган. Кунларнинг бирида гўзал Алинани мода вакиллари учратиб қолади ва унга турли таклифлар келиб тушади ва шу тариқа у киносаноатига ҳам кириб келади.
Ясемин Аллен
Келиб чиқиши британиялик бўлган турк актрисаси “Муҳташам юз йил” сериалида Дефне султон ролини ўйнаган. Унинг отаси инглиз, онаси эса турк. Ясемин кино ва телевидение факультетида таҳсил олган.
Чағатой Улусой
“Ичкарида” сериалидаги роли билан ўзбек мухлисларига яхши таниш бўлган Чағатой Улусойнинг отаси болгариялик, онаси эса босниялик.
Киванч Татлитуғ
“Тақиқланган севги”, “Курт Сейит ва Александра” ва “Тақиқланган севги” телесериаллари юлдузи Киванчни туркиялик Бред Питт деб ҳам аташади. У Косово албанларининг кўп фарзандли оиласида дунёга келган. У болалигидан баскетболга қизиқар, актёр бўлишни хаёлига ҳам келтирмаган эди. Аммо спортда жиддий жароҳат олгани туфайли баскетболни ташлашга мажбур бўлган ва моделликка ишга кирган.
Филиз Аҳмет
“Муҳташам юз йил” сериалидаги Нигор халфа Македонияда туғилган, болалиги ҳам шу ерда ўтган. Баъзи манбалар актрисани албаниялик ёки босниялик деб таърифлашади. Отаси эса турк бўлган. Ота томондан бобоси театр актёри бўлган.
Айдан Шенер
“Чолиқуши” сериалининг қаҳрамони Айдан Шенер 1963 йилда Туркияда туғилган. 18 ёшида у “Туркия гўзали” танловида қатнашиб, ғолиб бўлган. Унинг ота-онаси аслида қозонлик бўлишган.
Селма Эргеч
Хадича султон образи Селмага жаҳон миқёсида машҳурлик келтирди. У 1978 йилда Германияда туғилган. Отаси турк, онаси немис миллатига мансуб.
Туба Буюкустун
Гўзал, ақлли ва истеъдодли актриса Туба Буюкустуннинг отаси грек, онаси эса қрим-татар миллатига мансуб. Ҳозирда актриса ажримдан сўнг икки фарзандини ёлғиз тарбия қилмоқда.
Неслиҳан Атагул
Яшил кўзли мафтункор Неслиҳан 1992 йилда Истанбулда туғилган ва 8 ёшида келажакда албатта актриса бўлишни мақсад қилган. Неслиҳаннинг отаси Яшан Сенер (Туркияга кўчиб келгач исмини ўзгартирган бўлиши мумкин) келиб чиқиши черкас, онаси эса рус ҳамда беларус миллатига мансуб. Оила СССР ҳудудида яшаган, кейинчалик мамлакат парчаланиб кетгач, Туркияга кўчиб келган.
Ўсмирлигидан Неслиҳан актёрликка жуда қизиққан ва унинг танловини ота-онаси ва акаси Илкай Атагул доим қўллаб-қувватлаган. Натижада Неслиҳан 13 ёшида киносаноати ва шоу-бизнесга кириб келган.
Изоҳ (0)