“Одамларнинг муносабатларидан кўп йиғлайман”. “Осиё гўзали” Шаҳризода Мадаминова моделлик соҳасининг машаққатлари ҳақида (видео)

Ўзбекистонлик модель, актриса Шаҳризода Мадаминова 20 ёшда. У Ливан пойтахти Байрутда ўтказилган “World next top model — 2024” гўзаллик танловида “Осиё гўзали — 2024” (Мiss Аsiа—2024) номинацияси ғолиби бўлди. Актриса Озода Нурсаидованинг “Аламлар” қўшиғига ишланган клип ҳамда бир нечта теленовелладаги образлари билан томошабинларга яхши таниш.

— Ўзбекистонда моделларга муносабат у қадар яхши эмас, бунинг сабаби нимада деб ўйлайсиз?

— Тўғри, чунки кўп қизлар шу соҳада иш бошлаб, кейин бошқа ёмон йўлларга кириб кетади, шунинг учун одамларнинг моделлар ҳақидаги фикри ўзгаради. Ҳамма ўзига тўғри бўлиши керак. Ота-онам, яқинларим билишади қандай одамлигимни.

— Instagram’да ҳам совчилар келяпти деб, сторис жойлаб турасиз. Идеалингиздаги турмуш ўртоқ қандай бўлиши керак?

— Instagram’да ҳам идеалимдаги инсон ҳақида кам гапираман. Чунки Худонинг ўзи бизга қандай одамни беришни билади, шунинг учун ўзимнинг инсонимни кутаман. Шу пайтгача ҳеч кимни севиб қолмаганман. Ўзимни жуда қаттиқ яхши кўраман. Лекин ҳар тарафлама мени тушунадиган, қўллаб-қувватлайдиган инсонни кутяпман. Улғайганим сари ёнимда эшитадиган ва тушунадиган инсоним бўлиши кераклигини англаяпман.

— Келажакда турмуш ўртоғингиз моделлик соҳасида фаолият юритишингизни истамаса, бу сизга қанчалик таъсир қилади, оила учун санъатдан воз кеча оласизми?

— Албатта, турмушга чиққанимдан кейин бу масалада муаммо бўлмайди. Ҳам оила, ҳам карьерани бирдек олиб бораман, фақат моделлик эмас, бизнес соҳасида. Моделликни тарк этишим осон. Бу соҳага кирдим, санъат нонини едим, ўзим хоҳлаган ҳамма нарсани ҳис қилиб кўрдим ва бу мен учун етарли бўлди. Энди Фарғонада гўзаллик салони очмоқчиман, аёллар учун ёнида овқатланиш жойи бўлган автосалон очиш ниятим бор.

— Моделлик қилганингиздан афсусланган пайтингиз бўлганми?

— (Ўйланиб) Тўғрисини айтсам, бўлган. Кўп йиғлайман. Одамларнинг ноўрин гап-сўзларига, ота-онам ёмон гаплар эшица авваллари жуда кўп йиғлардим. Бу соҳани танлаб бекор қилибман дейман-у, лекин барибир касбимни яхши кўраман. Шунинг учун менга шогирдликка келадиган қизларга ҳам “Бу касб осонмас, чидай олсангиз, тайёр турсангиз киринглар бу соҳага, бўлмаса ўзингиз учун ўрганиб чиқиб кетишингиз мумкин” деб тушунтираман.

— Ўзбекчилик, қариндош-уруғ нима дейди, деймиз. Модель, актриса бўлишингизга ота-онангиз томонидан қаршиликлар бўлганми?

— Актрисаликка ўқиётганимда “Нима қиласиз қизингизни актриса қилиб, бизга тўғри келмайди” деганлар ҳам бўлган. Онам қариндошлар гапиришяпти, деганларида “илтимос, нима қилибди актриса бўлсам” деб йиғлардим. Лекин ота-онам тушунган, одамларнинг гап-сўзига қарамаган ва қаршилик қилмаган.

Ҳозир ҳақиқий ўзбек қизлари ҳам камера билан ишлашни, машҳур бўлишни, унга эътибор қаратишларини хоҳлайди. Моделлик мактабимга рўмолли қизлар ҳам келади. Кастингида 100 дан ортиқ қизлар қатнашган Фарғонада ўтказилган “Водий гўзали” гўзаллик танловида ҳам ҳижобли қизга ҳакамлар билан келишган ҳолда 2-ўринни бердик.

Шаҳризода Озода Нурсаидованинг “Аламлар” клипида ва яна кўплаб фильм, сериал, новеллаларда роль ижро этган. Шу билан бирга Instagram саҳифасини ҳам актив юритади. У кўпроқ моделлик ишлари, бизнеси ва lifestyle видеоларини обуначилари билан бўлишади.

— Нега клипларда кам кўриняпсиз, деярли йўқсиз? Юлдуз Усмонова, Ҳамдам Собиров каби санъаткорлардан клипга таклиф бўлса нима дейсиз?

— Албатта, агар яхши таклиф бўлса чиқаман. Ўзи умуман клипларда кам чиқаётганимга сабаб бор — клипларда мавзу фақат севги, севишганлар. Қайсидир актёр билан қучоқлашиб роль ўйнашга тўғри келади, мен эркаклар билан яқин масофада роль ўйнолмайман, қўлини ҳам ушлолмайман. Шу сабабли ҳам кўпчиликка рад жавобини берганман. Режиссёрлар ҳам мени чақирмай қўйган (кулиб).

Видеони тўлиқ ҳолда YouTube’даги “Дарё Lifestyle” каналида томоша қилинг.