“Фарзандларимиз ўртасида тўполон бўлишини хоҳламайман” — Шерали Жўраев ўз қўшиқларига муаллифлик ҳуқуқи олингани ҳақида (архив видео)

Ўзбекистон халқ артисти, марҳум Шерали Жўраев 12 йил аввал Фарғона вилоятидаги Шоҳимардон қишлоғида берган концертида қўшиқлари муаллифлик ҳуқуқи остида ҳимоя қилинишини айтиб, ундан бошқа санъаткорлар ўғирламаслигини сўрган.

Тепада ўтирганларнинг ўзлари бузиб турса, ёшлар нима қилсин, қаёққа қараб кецин улар? Шунинг учун маслаҳатим, ўзингизнинг қўлингиздан келган нарсани қилинг. Бировдан ўғирламанг, “Билмайди”, десангиз, хато қиласиз.

Бу қўшиқларнинг ҳаммаси қонун-қоидалардан ўтказилиб, муаллифлик ҳуқуқи олинган. Эртага фарзандларингиз чиқиб, “Бу менинг дадамнинг мусиқаси эди”, деса, менинг фарзандларим эса “Бу менинг дадамнинг мусиқаси”, деса, тўполон бўлади. Мен буни хоҳламайман. Шунинг учун биродарлар, мусиқачилар, хонандалар, бир-бирингларнинг ҳурматингларни жойига қўйинглар, — деган халқ артисти.

Шерали Жўраев хонанда ва мусиқачиларни ҳурмат қилишини таъкидлаб, “Сизлар элнинг фарзандларини тўғри йўлга етаклайдиган зотсизлар”, деб таъриф берган.

Аввалроқ Шоҳжаҳон Жўраев Шерали Жўраев қўшиқларининг қоровули сифатида машҳур санъаткорлардан отасининг қўшиқларига “осилмасликни” сўраган эди.

Маълумот учун, Шерали Жўраев 2023 йил узоқ давом этган хасталикдан сўнг 77 ёшида вафот этган. Буюк ҳофиз ижодий фаолияти давомида юзлаб қўшиқлар яратди, Шерали Жўраев ижод мактабига асос солди, юзлаб шогирдлар чиқарди. 1981 йилда “Ўзбекистонда хизмат кўрсатган артист” фахрий унвони билан, 1987 йилда “Ўзбекистон халқ артисти” фахрий унвони билан, 1991 йилда Алишер Навоий номидаги Ўзбекистон Республикаси давлат мукофоти билан, 2018 йилда “Тожикистон халқ артисти” фахрий унвони билан, 2018 йилда “Фидокорона хизматлари учун” ордени ва 2022 йилда “Эл-юрт ҳурмати” ордени билан мукофотланди.

Эслатиб ўтамиз, хонанда Қодиров Ботир Шералиевич жавобгарлар — Шоҳжаҳон ва Зоҳиршоҳ Жўраевлардан оталикни белгилашни талаби чиққан суд иши давом этмоқда.

Ҳолат юзасидани изоҳ берган Зоҳиршоҳ Жўраев жамоатчиликдан бундай пиар ва ҳайпларга оиласини аралаштирмасликни илтимос қилиб сўраган.

Кейинроқ Ботир Қодиров Шерали Жўраевнинг никоҳли фарзанди эканлиги ҳамда марҳум ҳофизнинг ўғиллари билан нима мақсадда судлашаётгани ҳақида гапирган эди.

Шерали Жўраевнинг биринчи турмуш ўртоғи Хурсаной ая Ботир Қодиров ҳақиқатан ҳам Шерали Жўраевнинг ўғли эканлигини таъкидлаган.