Россия Федерацияси Ички ишлар вазирлиги Москва шаҳри Бош бошқармасининг Вояга етмаган ҳуқуқбузарларни вақтинча сақлаш маркази томонидан тегишли битимга мувофиқ тўрт нафар вояга етмаган шахс Ўзбекистонга олиб келинди. Бу ҳақда Ижтимоий ҳимоя миллий агентлиги хабар бермоқда.
Айтилишича, вояга етмаганларнинг оилалари олдиндан ўрганиб чиқилган бўлиб, уларнинг оғир турмуш шароитида қолдирилганлиги баҳоланмоқда.
Кейинчалик уларга боланинг эҳтиёжларидан келиб чиққан ҳолда психологик ёрдам, ҳуқуқий маслаҳатлар, ўқишга ёки ишга жойлаштириш ва бошқа хизматларни ўз ичига олган комплекс ижтимоий хизматлар кўрсатилади, дейилади агентлик ахборотида.
Маълумот учун, август сентябрь ойларида хорижда ота-она қарамоғидан маҳрум бўлган 34 нафар бола Ўзбекистон Республикасига қайтарилди. Ўтган давр мобайнида жами 89 нафар Ўзбекистоннинг вояга етмаган фуқаролари қайтарилди.
Ижтимоий ҳимоя миллий агентлиги томонидан уларга ўзларининг яшаш манзилига яқин “Инсон” ижтимоий хизматлар марказлари томонидан бир қатор ижтимоий хизматлар, жумладан, болаларнинг ўзлари ва уларнинг оила аъзоларига психологик ва ҳуқуқий ёрдам кўрсатилмоқда.
Бундан аввал Россияда қаровсиз қолган 8 ойлик гўдак Ўзбекистонга, ота-онаси бағрига, қайтарилган эди. Шунингдек, Туркияда турли сабаблар туфайли ота-онасининг қарамоғидан маҳрум бўлган 16 ёшли ва 6 ёшли 2 нафар қиз, 11 ёшли бир нафар ўғил бола яқин қариндошларининг мурожаатлари асосида ватанга қайтарилган.
Изоҳ (0)