Ижтимоий тармоқларда 25 ноябрь куни Наманган вилояти Чуст туманида олиб борилган мажбурий ижро ҳаракатлари акс этган видеолавҳа тарқалди. Видеода банк, МИБ ва ИИО ходимлари хонадондан қарздорликни ундириш мақсадида икки бош қора молни олиб кетишга уринаётгани, лекин уй эгаси қаршилик қилганини кўриш мумкин.
Аёл ундирувчи ходимларга эри билан гаплашиши кераклигини, мол унинг ота-онасининг пулига келганини қайта-қайта айтади. Бу жараёнда бир бола молини олиб кетишаётгани учун йиғлаётгани эшитилган.
Ҳолат юзасидан МИБ ахборот хизмати “Дарё”га изоҳ берди. Айтилишича, мазкур ҳолат Мажбурий ижро бюроси Наманган вилоят бошқармаси ишчи гуруҳи томонидан ўрганилган.
“Қарздор Б.Ж.дан банк фойдасига 36 миллион сўм ундириш кўрсатиб ўтилган. Унга ихтиёрий муддат берилган, бироқ ана шу вақт ичида Б.Ж. қарзни тўлаш ўрнига турли баҳоналар билан тўловни пайсалга солган. Шундан кейин давлат ижрочиси томонидан мажбурий ижро ҳаракатлари олиб борилган.
Ишчи гуруҳ қарздорлик эвазига яшаш эҳтиёжидан ортиқча бўлган мол-мулклари, аниқроғи, қорамолни хатлаш учун олиб чиқишади”, — дейилади МИБ ахборотида.
Қўшимча қилинишича, ундирув ҳаракатлари вақтида суд буйруғига алоқаси бўлмаган, яъни қариндоши келиб ижро ҳаракатларига кескин тўсқинлик қилади. Ижро ҳаракатларида тартибни сақлаш учун хизмат олиб бораётган ички ишлар органлари ходимлари талабларига бўйсинмай, овоза кўтарган.
Мазкур ҳолат юзасидан тегишли баённома расмийлаштирилиб, амалдаги тартибга кўра вақтинчалик ушланиб, қонуний чора кўриш учун ИИБ Чуст туман бўлимига олиб келинади ва 5 суткалик маъмурий қамоқ чораси кўрилган.
Бундан ташқари, ижтимоий тармоқларда қарздорлик эвазига 10 бош қўй хатланаётган жараён акс этган видео бўйича ҳам МИБ ахборот хизмати қўшимча изоҳ берди.
Аниқланишича, фуқаролик ишлари бўйича Чуст туманлараро судининг буйруғига кўра қарздор С.А. банк фойдасига 40 миллион 68 минг сўм ундириш белгиланган. Қарздор бир неча бор огоҳлантирилган. Бироқ қарздорлик бартараф этилмагани учун мажбурий ижро ҳаракатлари олиб борилган. Аммо қарздорлик тўланмагани сабабли 10 бош қўй хатланган.
Изоҳ (0)