Ўзбекистоннинг Наманган вилоятида боғча болалари ва мактаб ўқувчиларини заҳарлагани тахмин қилинаётган йод халқаро қидирувдаги шахс раҳбарлик қилаётган МЧЖ томонидан ишлаб чиқарилгани айтилмоқда.
МЧЖ раҳбарининг қидирувда экани тўғрисидаги маълумот АҚШ Иммиграция ва божхона хизмати расмий сайти орқали оммалашмоқда.
Қидирувдаги ўзбек тадбиркорига қандай айб қўйилган?
“Само” МЧЖ асосчиси Нодир Юнусов Соғлиқни сақлаш вазирлигининг мактаблар ва болалар боғчаларига антиструмин препаратини етказиб бериш бўйича кўп миллиард долларлик тендерда ғолиб чиққан. Юнусовга одам савдоси, қул меҳнати, фирибгарлик, рекетчилик ва коррупцияга учраган ташкилот ташкил этиш каби айбловлар қўйилган.
“Дарё” мазкур хабарга аниқлик киритиш мақсадида Нодир Юнусов раҳбарлигидаги Zuma Pharma корхонаси сайтида кўрсатилган телефон рақамлари билан боғланди. Масъуллардан бирининг маълумот беришича, айни пайтда ташкилотда барчаси жойида. Корхона ходими журналистнинг “Нодир Юнусов айни пайтда иш жойидами?”, деган саволига бир оздан сўнг аниқлик киритиб, жавоб беришини билдирди.
Нодир Юнусов раҳбарлигида корхонада фавқулодда йиғилиш бошланди
Таҳририят журналисти масъулнинг жавобини билиш учун корхона рақамига такрорий қўнғироқни амалга оширди. Иккинчи маротаба қилинган қўнғироққа жавоб берган навбатчи ходим журналист билан мулоқот қилган ходимнинг ўзини чақириб беришини билдирди. Бироқ, бир оздан сўнг корхонада фавқулодда йиғилиш бошланиб қолганини, аммо йиғилиш Нодир Юнусов раҳбарлигида эмаслигини, барча саволларга йиғилишдан сўнг жавоб берилишини қўшимча қилди.
Zuma Pharma корхонасининг Telegram’даги расмий каналида маълум қилинишича, корхона раҳбари Нодир Юнусов 2023 йилнинг 13 июль куни Хитой Халқ Республикасининг “ЛУЕ” корпорацияси вакиллари ва Фармацевтика тармоғини ривожлантириш агентлиги директори Улуғбек Эгамовни қабул қилган.
Дастлаб “ЛУЕ” корпорацияси вакиллари компания ҳамда улар томонидан ишлаб чиқарилаётган маҳсулотлар ҳақида маълумотлар бериб ўтишди. Корхонамиз раҳбари Нодир Юнусов УГП гуруҳ корхоналари ҳақида маълумот бериб, Zuma Pharma корхонасини ишлаб чиқариш жараёнлари, микробиология бўлимларини яқиндан таништирди, — дейилади корхона масъулларининг ўша пайтдаги ахборотида.
Нодир Юнусов Zuma Pharma МЧЖ раҳбари сифатида “Sputnik V” вакцинасини Ўзбекистонда ишлаб чиқаришни ҳам йўлга қўймоқчи бўлган эди.
Аввалроқ Наманган вилоятида 450 нафар бола айнан шу МЧЖ томонидан ишлаб чиқарилган ёддан заҳарланиб, шифохонага мурожаат қилгани айтилганди. Соғлиқни сақлаш вазири ўринбосари Элмира Боситхонова болалар дори ёки овқатдан заҳарланмаган. Лекин ҳали буни аниқлаб улгурмадик деганди. Шу гапни ОАВга айтган масъул, бир вақтнинг ўзида Соғлиқни сақлаш бошқармалари ҳамда “Само” МЧЖ раҳбарига хат чиқариб, болаларнинг шу ёдни қабул қилишини вақтинча тўхтатиб турайлик деганди.
Болаларнинг заҳарланиши ортидан жиноят иши қўзғатилган
Наманган вилоятида болалар заҳарланганлиги ҳолати юзасидан Бош прокуратура томонидан Жиноят кодексининг 257-1-моддаси (санитарияга оид қонунчиликни ёки эпидемияга қарши кураш қоидаларини бузиш) билан жиноят иши қўзғатилган.
“Дарё” Zuma Pharma МЧЖ масъулларининг ҳолат юзасидан қўшимча тушунтириш бериши учун минбар беришга тайёрлигини маълум қилиб, ҳолатга ташкилот вакиллари томонидан аниқлик киритилади деган умидда.