Эндиликда бир қатор ижтимоий тўловлар Ижтимоий ҳимоя миллий агентлиги томонидан амалга оширилади.
Ўзбекистон президентининг 2023 йил 1 июндаги фармонига мувофиқ, 2024 йил 1 январдан бошлаб қуйидаги ижтимоий тўловлар Ижтимоий ҳимоя миллий агентлиги тасарруфига ўтказилди:
- ёшга оид нафақа;
- боқувчисини йўқотганлик нафақаси;
- ўзгалар парваришига муҳтож ногиронлиги бўлган 18 ёшгача болаларнинг парвариши билан банд бўлган қонуний вакилига нафақа;
- болаликдан ногиронлиги бўлган шахсларга нафақа (1 ва 2-гуруҳ, 18 ёшдан катта);
- 1 ва 2-гуруҳ ногиронлари учун нафақа;
- кам таъминланган оилалар учун болалар нафақаси;
- кам таъминланган оилаларга моддий ёрдам;
- фарзанд туғилганда бериладиган бир марталик нафақа (“суюнчи пули”);
- дафн қилиш учун нафақа (“дафн пули”).
Бунда ижтимоий тўловлар учун ариза бериш, уларни кўриб чиқиш, тайинлаш ва тўлашнинг амалдаги тартиби сақлаб қолинади. Эндиликда фуқаролар мазкур ижтимоий тўловлар билан боғлиқ барча саволларига туман ёки шаҳарлардаги “Инсон” ижтимоий хизматлар марказларига мурожаат қилишлари мумкин.
Фармонга кўра, Ижтимоий ҳимоя миллий агентлиги аҳолини ижтимоий ҳимоя қилиш соҳасида ягона давлат сиёсатини ишлаб чиқиш ва уни амалга оширишни таъминлайди. Ижтимоий ҳимояга муҳтож шахслар ва оилалар бўйича ижтимоий ёрдам дастурларини ишлаб чиқади.
Авваллари Ўзбекистонда ижтимоий ҳимоя соҳасида хизматларни кўрсатиш бир неча ташкилотларга юклатилганди. Эндиликда босқичма-босқич ижтимоий ҳимоя масалалари агентлик тасарруфига ўтади. Фармонда шунингдек, “Ижтимоий ҳимоя ягона реестри” ахборот тизими ҳам агентлик тасарруфига ўтказилиши белгиланган.
Маълумот учун, аҳолига кўрсатиладиган барча турдаги ижтимоий хизматлар ва ёрдамлар, шу жумладан, кам таъминланган оилалар болалари учун нафақа ва моддий ёрдамлар бўйича аризалар “Ягона миллий ижтимоий ҳимоя” ахборот тизими орқали қабул қилинади.
Изоҳ (0)