Ижтимоий тармоқларда Украина компанияси томонидан ишлаб чиқарилган “Антиструмин-Дарниця” препарати сурати илова қилинган хабарда мазкур дори воситасидан Ўзбекистонда болалар нобуд бўлгани ҳамда ушбу препаратни қўлламаслик тўғрисида номаълум аёл кишига тегишли аудио тарқалмоқда. Фармацевтика маҳсулотлари хавфсизлиги маркази давлат муассасаси ҳолат юзасидан маълумот берди.
Қайд этилишича, дори воситаси тиббиёт амалиётида қўлланиши учун қонунчиликка мувофиқ, қоида тариқасида дастлаб давлат рўйхатидан ўтказилиши зарур. Мазкур жараёнда дори воситасининг тегишли ҳужжатлари ўрганилиб, марказ лабораториялари томонидан унинг сифати, хавфсизлиги ва самарадорлиги тасдиқлангандан сўнггина, ижобий хулосалар асосида давлат рўйхатидан ўтказилади.
Шу билан бирга, рўйхатдан ўтказилган дори воситасининг ҳар бир серияси сертификатлаштириш жараёнидан ўтиб, ҳар бир серия маҳсулотга мувофиқлик сертификати расмийлаштирилади.
Маълум қилинишича, аудиохабарга сурати илова қилинган Украина компаниясига тегишли “Антиструмин-Дарниця” дори воситаси мамлакатда давлат рўйхатидан ўтказилмаган бўлиб, тиббиёт амалиётида қўлланишига рухсат этилмаган.
“Шу ўринда, Фармацевтика маҳсулотлари хавфсизлиги маркази Telegram’да тарқалаётган аудио юзасидан юртдошларимиз хавотирга тушмасликларини, хабарда айтилаётган маълумотлар ҳақиқатга мутлақо зид эканлигини маълум қилади”, — дейилади хабарда.
Изоҳ (0)