Тошкент ҳайвонот боғида пантера болалади. Бу ҳақда ҳайвонот боғи матбуот хизмати “Дарё”га маълум қилди.
Айтилишича, Wildlife Care бошқарув компанияси кўмагида Тошкент ҳайвонот боғига Тайфун лақабли нар пантера ва унинг тенгдоши Багира лақабли урғочи пантера олиб келинган.
“Боғимизда 2 май куни 4 ёшли нар Тайфун ва унинг тенгдоши урғочи Багира ўртасида урғочи пантера туғилди. Ёш пантера 500 грамм вазн билан туғилган, ҳозир унинг вазни 1 кг 800 грамм. Митти пантерани энди жамоатчиликка кўрсатяпмиз”, — деди боғ масъул ходими.
Унинг қўшимча қилишича, миттивой она сути билан озиқланади ва у ўзини яхши ҳис қиляпти.
“Бола пантерага ном қўйганимиз йўқ. Биз янги туғилган ҳайвонларга ном танлаш учун жамоатчилик муҳокамасига қўймиз ва энг яхшсини танлаб оламиз. Урғочи пантерага яқин кунларда ном танлашни эълон қиламиз”, — деди боғ маъмури.
Маълумот учун, халқаро қонунларга мувофиқ боқиш ва кўпайтириш мақсадида бир жуфт пантера 35-40 минг долларга Тошкент ҳайвонот боғига олиб келинган.
Изоҳ (0)