AQSHga tarixdagi eng dahshatlisi bo‘lishi kutilayotgan “Milton” to‘foni yaqinlashmoqda. To‘fon balandligi 4,5 metrgacha yetadigan to‘lqinlarni yuzaga keltirishi kutilmoqda, Floridaning markaziy va janubiy aholisi xavf ostida.
“Milton” to‘foni so‘nggi 100 yildagi eng kuchli to‘fonga aylanishi mumkin. Florida shtati aholisi keng miqyosda evakuatsiya qilinmoqda, deb xabar berdi CNN telekanali.
5-toifali “Milton” to‘foni Florida qirg‘oqlari tomon yaqinlashmoqda. U 9-oktyabr kechasi Tampa ko‘rfazi hududiga urilishi kutilmoqda, deb yozadi WUSF.
Shamol tezligi 257 km/soat bo‘lib, bu so‘nggi yillardagi eng xavfli to‘fonlardan biriga aylanadi. Shtatning g‘arbiy qirg‘oqlari bo‘ylab odamlarning hayoti va mol-mulkiga katta xavf tug‘diruvchi 4,5 metrgacha bo‘lgan to‘lqinlar yuzaga kelishi kutilmoqda. To‘fon yarim oroldan o‘tgandan keyin sharqiy qirg‘oqda ham suv toshqini kutilmoqda.
Florida shtatining bir qancha hududlarida, jumladan Pinellas okrugi va Anna Mariya orolida evakuatsiya ishlari olib borilmoqda. Odamlar uylarini ommaviy ravishda tark etishmoqda, magistral yo‘llarda katta tirbandliklar mavjud.
Rasmiylar aholini ogohlantirishlarni e’tiborsiz qoldirmaslikka chaqirmoqda, chunki to‘fon, suvning ko‘tarilishi tufayli halokatga olib kelishi mumkin, deb xabar beradi Fox Weather.
CNN’ning ma’lum qilishicha, Floridaning markaziy va janubiy qismidagi uch milliondan ortiq aholi xavf ostida.
Bu hududda bir nechta tornadolar bo‘lishi mumkinligi ham xabar qilinmoqda.
Izoh (0)