Қирғизистон терма жамоаси Россияга қарши ўртоқлик ўйини ўтказа олмайди.
“Терма жамоамиз Осиё минтақаси саралашида иштирок этмоқда. Бу эса июнгача бўлган FIFA кунларининг барчаси банд дегани.
10 октябрь куни Қатарга қарши ўйнаймиз, 15 октябрда эса Шимолий Кореяни қабул қиламиз. 14 ноябрда БАА меҳмони бўламиз, 18-да эса Эронга қарши майдонга тушамиз.
РФИ ўртоқлик ўйини бўйича таклиф билан чиққани йўқ. Бишкекда ўйин ўтказган вақтимизда эҳтимолий ўйинни муҳокама қилгандик, лекин улар бизнинг тақвимимиз расмий ўйинлар билан банд бўлганини билса керак”, — дейди Қирғизистон футбол уюшмаси бош котиби Нурдин Букуев.
Шунингдек, Букуев ўртоқлик ўйинлари ўтказиш борасида ҳам ўз фикрларини билдириб ўтди.
“Кучли рақиблар билан ўйнаш ҳар доим қизиқ бўлган. Россияга қарши ўйин эса жуда ҳам қизиқ. 2025 йилда ўйнашимиз мумкинми? Барчаси саралашдаги натижаларга боғлиқ, бу музокараларга ўз таъсирини ўтказади. Доимо кучли рақиблар бизни қизиқтириб келган. Ҳозирда Россияга қарши ўйин муҳокама қилинмаяпти”, — дейди бош котиб.
Аввалроқ Тожикистон терма жамоаси ҳам Россияга қарши ўртоқлик ўйини ўтказиш режаси йўқлигини маълум қилганди.
Эслатиб ўтамиз, Қирғизистон терма жамоаси ЖЧ—2026 саралаш босқичида Ўзбекистон билан бир гуруҳдан жой олган ва 2 турдан сўнг бирорта ҳам очко жамғармаган ҳолда сўнгги ўринда бормоқда.
Изоҳ (0)