Режиссёр Дэнни Бойл томонидан суратга олинган пост-апокалипсис ва зомбилар ҳақидаги “28 йил ўтиб” номли қўрқинчли фильм iPhone 15 Pro Мах’да суратга олингани маълум бўлди. Бюджети 75 миллион доллар бўлган мазкур фильм смартфонда суратга олинган кино тарихидаги энг қиммат лойиҳага айланади.
Суратга олиш ишларининг асосий қисми август ойининг охирида якунланди. Режиссёр Дэнни Бойл оператор Энтони Дод Мэнтл билан биргаликда картина устида иш олиб бормоқда. Улар 2009 йилда “Харобадан чиққан миллионер” фильми учун “Оскар”ни қўлга киритган эди.
Аввалига “28 йил ўтиб” фильми смартфонларда суратга олингани барчадан сир тутилди. Ҳатто ижодий гуруҳдан ушбу тафсилотни ошкор қилмаслик тўғрисида шартномалар имзоланди. Бироқ папараццилар телефон солинган махсус қути ҳамда унга ўрнатилган катта объективни тасвирга олишга муваффақ бўлди.
Экспертлар бу нимани англатишини дарҳол тушунди ва хабар бутун дунё ОАВда тарқала бошлади. Фильмда иштирок этаётган бир нечта шахслар ушбу маълумотни WIRED нашрига тасдиқлади.
“28 йил ўтиб” фильми ностандарт ва кутилмаган технологиялардан фойдаланилган ёки смартфонда суратга олинган биринчи йирик лойиҳа эмас. 2002 йилда Дэнни Бойл ва кинематограф Энтони Дод Мэнтл томонидан “28 кун ўтиб” фильми ўша давр учун энг юқори технологияли бўлган Canon XL-1 камерасида суратга олинган.
Фильм премьераси 2025 йил 20 июнда бўлиб ўтиши режалаштирилган. “28 йил ўтиб” фильми “28 кун ўтиб” (2002) ва “28 ҳафта ўтиб” (2007) номли зомбилар ҳақидаги даҳшатли жанрдаги фильмларнинг мантиқий давомидир. Биринчи қисмда бош ролни ижро этган актёр Киллиан Mёрфи триквелда ҳам иштирок этади.
Изоҳ (0)