ФИФА “Бунёдкор” клуби устидан Ривалдо ва Денилсон иши бўйича қарор чиқарди

ФИФА диссиплинар қўмитаси “Бунёдкор” клуби ва унинг собиқ футболчилари Ривалдо ҳамда Денилсон ўртасида узоқ давом этган молиявий низолар бўйича қарор қабул қилди.

Трибуна манбасининг хабарига кўра, ФИФА “Бунёдкор” клубининг Ривалдо олдидаги қарздорлиги (8,1 миллион евро) ва Денилсон олдидаги қарздорлиги (1,1 миллион евро) бўйича маблағни тўлаш қарорини ЎФАга юборган.

ФИФА тартиб-интизом қўмитаси аъзолари 22 февраль куни “Бунёдкор” клуби ва бразилиялик ўйинчилар ўртасидаги мазкур иш бўйича қарорни қабул қилган. ФИФА қарорида қуйидагилар маълум қилинган:

“Бунёдкор” ва Ривалдо ўртасидаги иш бўйича:

1. “Бунёдкор” клуби ФИФА низоларни ҳал қилиш палатасининг 2017 йил 21-сентябрьда қабул қилган қарорини тўлиқ бажармаганликда айбдор деб топилган. Бу Спорт арбитраж суди томонидан 2023 йил 6 ноябрда чиқарилган қарорда тўлиқ тасдиқланган.

2. “Бунёдкор” клуби ФИФА низоларни ҳал қилиш палатаси ва CAS қарорига кўра, Ривалдо Vitoр Борба Феррейрега қуйидагиларни тўлаши шарт:

2 489 947 евро – клуб томонидан бразилиялик футболчига тўланмаган мукофот пули ҳамда йиллик 5 фоиз устама;

5 664 000 евро – шартнома бекор қилиниши сабабли товон пули ҳамда йиллик 5 фоиз бонус.

10 минг Швейцария франки – арбитраж суди жараёнида харажатлар учун товон пули.

“Бунёдкор” ва Денилсон ўртасидаги иш бўйича:

1. “Бунёдкор” клуби ФИФА низоларни ҳал қилиш палатасининг 2017 йил 21-сентябрьда қабул қилган қарорини тўлиқ бажармаганликда айбдор деб топилган. Бу Спорт арбитраж суди томонидан 2023 йил 6 ноябрда чиқарилган қарорда тўлиқ тасдиқланган.

2. “Бунёдкор” клуби Денилсон Мартинш Насиментога қуйидагиларни тўлаши шарт:

700 000 доллар – клуб томонидан бразилиялик футболчига тўланмаган мукофот пули ҳамда йиллик 5 фоиз устама;

400 000 доллар – келишув шартлари бузилганлиги учун товон пули ҳамда йиллик 5 фоиз бонус.

10 минг Швейцария франки – арбитраж суди жараёнида харажатлар учун товон пули.

Қайд этилишича, ФИФА томонидан “Бунёдкор” клубига 30 кун ичида ушбу маблағни тўлаш мухлати берилган. Акс ҳолда ташкилот томонидан тегишли чоралар кўрилиши маълум қилинган.

Шунингдек, ҳар икки футболчи бўйича “Бунёдкор” клуби 30 000 минг швейсар франки миқдорида жаримага тортилган.

Эслатиб ўтамиз, Ривалдо 2008 йилдан 2010 йилга қадар “Бунёдкор” шарафини ҳимоя қилган. Денилсон эса 2010 йилда клуб сафида тўп сурган.