Ижтимоий тармоқлар ва интернетнинг бошқа завқлари ҳақида турлича муносабатда бўлишимиз мумкин, лекин кўпчилигимиз мем ва эможилар нима эканлигини биламиз. Аммо актёр Киллиан Мерфи унинг шахси ҳақидаги вирусли ҳикоялар тармоқда айланиб юрганини билмайди, эможи маъноларини тушунмайди, TikTok нима эканлигини ҳатто тахмин ҳам қилолмайди. Шунга қарамай, у жуда бахтли ҳаёт кечирмоқда.
Киллиан болалигида актёр бўлишни орзу қилмаган
Мерфи катта бўлганида ким бўлишни хоҳлаётганини билмаса ҳам, лекин бир нарсани аниқ биларди: у ўқитувчи бўлмайди. Унинг онаси француз тилидан, отаси эса мактаб ўқувчиларига математика ва ирланд тилидан дарс берган.
Айрим амаки ва холаларининг иши ҳам таълим тизими билан боғлиқ эди. Киллиан тарбияси оғир бола эмасди, жуда яхши ўқирди, лекин мактабдаги дарсларидан кейин ҳар куни ота-онаси унга қўшимча дарс ўтарди. Шунинг учун ўқиш унинг жонига текканди.
Аммо Киллианнинг мусиқага иштиёқи баланд эди. Гитара чалиш ва қўшиқ ёзиш уни мактабда доим ҳис қиладиган босимдан қутқаради — укаси Паиди билан биргаликда ҳатто мусиқий гуруҳ тузишади.
Бир мусиқа компанияси уларга 5 та альбом чиқариш учун шартнома таклиф қилади, аммо Паиди ҳали вояга етмагани ва мактабга борганлиги сабабли Мерфининг ота-онаси шартномани имзоламайди. Ҳозир эса Киллиан ўшанда шундай бўлганидан хурсанд. Мусиқа бизнеси қийин, Мерфи ва Паиди унда йўқ бўлиб кетиши аниқ эди.
У бир умрлик севгисини театрда топди
Киллиан 16-17 ёшида театрга қизиқа бошлаган бўлса-да, ота-онасининг маслаҳати билан мактабни тугатгач, юридик факультетга ўқишга киради. Лекин тезда ўқишдан ҳафсаласи пир бўлади ва институтни ташлаб кетади. Тахминан бир вақтнинг ўзида унга профессионал театрдаги спектаклларнинг биридан рол таклиф қилишади.
Спектакл бор-йўғи 4 ой давом этиши керак эди, аммо кутилмаганда у ҳақиқий хитга айланди. Труппа дастлаб Эдинбургда ўйнайди, кейин Лондонда намойиш этилади, ва ниҳоят жаҳон гастролларига чиқади.
Рассом Ивонн МакГиннесс ҳам театр билан гастрол сафарига чиқади. Кейинчалик Мерфи бу сафар унинг учун ҳаётидаги энг муҳим босқич эканлигини тан олади. Ўшанда у ҳозиргача қадрдон дўстлари бўлган одамлар билан учрашади ва Ивонни севиб қолади. Киллианнинг ишонч билан айтишича, хотинининг ёрдамисиз у актёрлик карьерасида бундай юксакликка эриша олмаган бўларди.
Ёшлар 2004 йилда турмуш қуради. Кейинги йили Мерфи “Арчагулни силкитган шамол” драмасида рол ўйнайди. Актёр ушбу фильмни ўзгача завқ билан эслайди, чунки суратга олиш ишлари Ирландияда бўлиб ўтган, шунинг учун у кўп вақтини рафиқаси билан ўтказиши мумкин эди. Ўша пайтда Ивонн ҳомиладор эди — суратга олишдан бўш вақтлари эр-хотин Корк тепаликларида сайр қилишарди. 2005 йилда уларнинг биринчи фарзанди — Малачи, икки йилдан сўнг иккинчи ўғли — Аран туғилади.
У ҳеч қачон шон-шуҳратни орзу қилмаган ва маошидан уялган
.webp)
Киллиан ҳеч қачон унинг шахсига бўлган қизиқиш ортиб бораётганига қувонмаган. У одатда шахсий ҳаёти ҳақида гапирмасликка ҳаракат қилади. Актёр интервью давомида ижод, фильмлар, китоблар, ҳамма нарсани муҳокама қилишга тайёр, энг муҳими, унинг шахси ёки оиласи ҳақида сўрашмаса бўлди. У ва рафиқаси камдан кам ҳолларда омма олдида кўриниш беради, уларнинг биргаликдаги фотосуратларини эса бармоқ билан санаш мумкин. Мерфи бўш вақтида оддий ҳаёт кечиришни, дўконга боришни, ити билан сайр қилишни, хотини билан овқат пиширишни ва ўғиллари билан ўйнашни яхши кўради.
У мухлислар билан жуда дўстона муносабатда бўлади, лекин нотанишлар уни суратга олишга ҳаракат қилишларини ёмон кўради. Киллианнинг фикрига кўра, бу унинг шахсий маконини қўпол равишда бузишдир. Унинг фикрича, томошабинни Киллианнинг ўзи эмас, балки биринчи навбатда унинг қаҳрамонлари қизиқтириши керак.
Камтар Мерфи катта миқдордаги гонораридан хижолат тортади. У меҳнати учун муносиб пул олишдан мамнунлигини яширмайди ва ўзини ҳақиқатан ҳам омадли одам деб билади. Аммо бунданда муҳимроқ ишларни бажарадиган бошқа одамлар — шифокорлар, ҳамширалар, ўқитувчилар бундай даромад билан мақтана олмайди. Ва у буни адолатсизлик деб ҳисоблайди.
Мерфи ва унинг оиласи Лондондан кетишга қарор қилишади
14 йилдан ортиқ вақт давомида Киллиан ва Ивонн фарзандлари туғилган Лондонда яшади. Аммо 2015 йилда оила Ирландияга қайтишга қарор қилди. Актёр бунга асосий сабаб ўғиллари эканини тан олади. Мерфи Лондондаги ҳаётдан завқланади, кино бизнесидан ҳам узоқлашишга ҳаракат қилмайди.
У шунчаки болаларининг ирланд бўлиб ўсишини хоҳлайди — улардаги британча аксентни эшитганда, уйга қайтиш вақти келганини англади. Бундан ташқари, Киллианнинг ота-онаси ўғли ва келинининг ёрдамига қараб қолган ёшга етган.
Уларнинг Ирландиядаги уйи интернетга уланмаган ва Мерфининг сўзларига кўра, ўғиллари бундан умуман хафа эмас. Унинг фикрича, бугунги кун болалари доимо ўзгариб турадиган дунёда улғайишлари осон эмас. Глобал тармоқ эса бу жараёнда умуман ёрдам бермайди. Ота-болалар бўш вақтларида одатда кино томоша қилишади.
Шу билан бирга, улар оталарининг актёрлик ишларини умуман ёқтирмайди. Киллиан эса болалари унинг касбига қизиқмаганидан хурсанд. Унинг фикрича, кино оламидаги шов-шувларнинг барчаси бемаъниликдан иборат.
Киллиан ижтимоий тармоқларга ҳам худди шундай эътиборсизлик билан муносабатда бўлади, унинг шу вақтгача битта ҳам аккаунти бўлмаган. Мерфи уларда ҳеч қандай маъно кўрмайди ва машҳурлигига эътибор бермасликни афзал кўради. Бундан ташқари, унга ўзи ҳақида кўп гапириш одобсиздек туюлади.
Изоҳ (0)