Gulbakhor Аirways томонидан умра тадбирларини ташкил этиш ва ўтказишда зиёратчиларга ноқулайлик юзага келгани бўйича хабарлар тарқалди. Экология, атроф-муҳитни муҳофаза қилиш ва иқлим ўзгариши вазирлиги ҳузуридаги Туризм қўмитаси ҳолат юзасидан муносабат билдирди.
Туризм қўмитаси томонидан мазкур ҳолат юзасидан тегишли қонуний чоралар кўрилмоқда. Ҳозирги вақтда зиёратчилар меҳмонхонага жойлаштирилган. Вазирлар Маҳкамасининг 2023 йил 8 августдаги “Умра тадбирларини ташкил этиш ва ўтказишда зиёратчиларнинг манфаатларини самарали ҳимоя қилиш бўйича қўшимча чора-тадбирлар тўғрисида” ги 345-сонли қарорига мувофиқ, туристик фаолиятни амалга ошириш лицензияси чиқиш туризми кичик турининг умра хизматларини кўрсатиш фаолияти бўйича 100 минг АҚШ доллари эквивалентидан кам бўлмаган миқдордаги маблағларни Туризм қўмитасининг Хавфсиз туризм жамғармасига захира қилиб қўйиш ҳамда ушбу маблағларнинг етарли миқдорини таъминлаб борилиши белгиланган.
Мазкур қарорга мувофиқ, тегишли туроператор томонидан Туризм қўмитасининг Хавфсиз туризм жамғармасига захира қилиб қўйиладиган 100 минг АҚШ доллари эквиваленти миқдоридаги маблағлардан унинг умра хизматларини сифатсиз кўрсатишидан жабр кўрган зиёратчиларга етказилган моддий ва маънавий зарар ўрнини қоплаш учун суд қарорига мувофиқ фойдаланилиши белгиланган.
Шунингдек, умра хизматларини кўрсатиш билан боғлиқ фаолият устидан жамоатчилик назоратини кучайтириш мақсадида Туризм қўмитаси ўз расмий веб-сайтида умра хизматларини кўрсатувчи туроператорлар рейтингини шакллантириш учун тегишли ахборот модулининг ишга туширилгани ва маҳаллий туроператор жамоатчилик томонидан берилган овозларга кўра рейтинги аниқланмоқда.
Лицензияга эга бўлмай умра тадбирларини ташкил этиш билан шуғулланаётган 23 та тадбиркорлик субъектларига камчиликларни бартараф этиш бўйича муддатлар белгиланиб, кўрсатмалар берилди.
Белгиланган муддатларда камчиликларни бартараф этмаган “Оrzu Travel” МЧЖ, “Ласточка-Планета” МЧЖ, “Premier Wаnderlust” МЧЖ, “Bobbisalam-Travel” МЧЖ, “Мuslim-Tour МТ” МЧЖ, “Delta Smart Project” МЧЖларнинг “чиқиш туризми” фаолияти билан шуғулланишга асос бўлган лицензиялари Тошкент шаҳар Туризм бошқармасининг қарорлари билан амалдаги қонунчиликка асосан 10 кун муддатга тўхтатилган бўлса “МГ Тур” МЧЖнинг лицензияси бекор қилинди.
Изоҳ (0)