Жиззахда чиқинди полигони қуриш буюртмачи ва пудратчи ўртасидаги шартномавий низолар сабаб тўхтаб қолган. Бу ҳақда Олий Мажлис Сенати ахборот хизмати маълум қилди.
Таъкидланишича, Сенат томонидан Жиззах вилояти ўрганилганда, вилоятнинг Зомин тумани “Ниҳол” МФЙ ҳудудида янги чиқинди полигони қурилиши ишлари ортга сурилиб келинаётгани аниқланган.
Зомин тумани “Ниҳол” МФЙ ҳудудида умумий майдони тахминан 10 гектардан иборат бўлган, биринчи босқичда туман аҳолисига ва келгусида қўшимча тарзда Янгиобод тумани аҳолисига хизмат кўрсатадиган янги чиқинди тўплаш полигони қуриш белгиланган.
Лекин ҳозирга қадар мазкур чиқинди полигони ишга туширилмаган. 2021—2022 йилларда мазкур полигон бўйича қарийб 5 млрд сўмлик иш бажарилган. Лекин буюртмачи ва пудратчи ўртасидаги шартномавий низолар сабаб ишлар тўхтаб қолган. Ваҳоланки, ҳозирда ушбу чиқинди полигонига бўлган эҳтиёж тобора ортиб бормоқда.
Энг эътиборлиси ушбу полигонни қуриш учун ҳаттоки молиявий маблағ масаласи ҳам президентнинг 2023 йил 2 майдаги қарорига мувофиқ ҳал этилиб, республика бюджетидан 5 миллиард сўмдан ортиқ маблағ ажратилиши белгиланган. Аммо лойиҳа ўз вақтида амалга оширилмаган, — дейилади юқори палата ахборотида.
Қўшимча қилинишича, мазкур чиқинди полигонини ишга тушириш чораларини кўриш Сенатнинг Оролбўйи минтақасини ривожлантириш масалалари ва экология қўмитасининг назоратига олинган.
Изоҳ (0)