Zo‘rTV журналистларини калтаклаган “Кўприкқурилиш” корхонаси ходимига қандай чора кўрилди?

Тошкент шаҳрида Zo‘rTV журналисти ва оператори калатаклангани, оператор айни пайтда шифохонага ётқизилгани ҳақида хабар берилганди. “Ўзбекистон темир йўллари” АЖ ҳолат юзасидан муносабат билдирди.

Унга кўра, “Ўзбекистон темир йўллари” АЖ раҳбарияти ОАВ вакилларига зўравонлик кўрсатиб, уларга қарши куч ишлатган ходим — “Кўприкқурилиш” трести унитар корхонаси 67-кўприкқурилиш отряди иш бошқарувчиси Н.Эшниязовнинг ишини кескин қоралайди. 

Мазкур ҳолат юзасидан зудлик билан ишчи гуруҳ тузилиб, бугуннинг ўзида Н.Эшниязов Меҳнат кодексининг тегишли бандларига асосан ишдан бўшатилди. Қайд этилишича, “Ўзбекистон темир йўллари” АЖ раҳбарияти ҳолат юзасидан ҳуқуқ-тартибот органлари қонунчилик нормаларига асосан тегишли чоралар кўришини қўллаб-қувватлайди.

“Дарё” билан суҳбатда бўлган канал журналисти воқеа пайтида телеканал камераси ва операторнинг бурни синганини маълум қилганди.

Операторимиз Сардорбек Йўлдошевнинг бурнини синдиришди. Айни пайтда операторимиз тез ёрдамда шифохонага олиб кетилган. Менда ҳам жароҳатлар бор. Шифокорлар тиббий кўрик зарур деди. Аммо телеканал камераси, микрофонини ишхонага етказишим керак эди. Шу сабаб мен барча иш қуролларни олиб ишхонага қайтдим, — деганди у.

Zo‘rTV журналисти Нурзодбек Воҳидовнинг қўшимча қилишича, воқеадан сўнг ҳудуд профилактика инспектори уларга қўнғироқ қилиб, воқеа ҳақида сўраган.