Тошкентнинг Юнусобод туманидаги қурилиш объекти олдида турган Matiz ва Spark хандаққа тушиб кетди.
ФВВ матбуот хизматининг маълум қилишича, воқеа 8 июль куни, тахминан, соат 12:00 ларда юз берган. Ниёзбек йўли кўчасида қурилаётган янги бинонинг пойдевори учун қазилган хандақнинг бир четида ер ўпирилиши натижасида унинг четидаги йўлда турган Matiz ва Spark хандаққа тушиб кетган.
Ҳодиса тўғрисида ФВВга хабар келиб тушмаган. Ижтимоий тармоқларда тарқалган хабар юзасидан воқеа жойига шаҳар ва туман ФВБ ходимлари чиқиб, ўрганиш ишларини олиб борган. Автомобильлар махсус техника ёрдамида хандақдан чиқариб олинган.
Ҳодиса оқибатида тан жароҳати олган ва ҳалок бўлганлар йўқ.
Қурилиш ва уй-жой коммунал хўжалиги вазирлигининг маълум қилишича, ҳандақнинг ён қисмидан, яъни маҳалла ички автомобиллар йўлидан ичимлик суви қувурлари ўтган бўлиб, ушбу қувурлар эскиргани ҳисобига уларда ёриқлар юзага келган. Оқибатда сув сизиб чиқиб, тупроқнинг намлиги ошган. Шу билан бирга ҳандақда тупроқ зичловчи техника ишлаган вақти ер қатламининг юмшаган қисмида ер ўпирилиб тушган.
Ушбу ҳолат юзасидан ҳудудга масъул инспектор томонидан буюртмачи ва лойиҳачи ташкилоти вакилларига ҳимоя тўсиқларини ўрнатиш ҳамда ҳандақ деворларини маҳкамлаш чораларини кўриб, лойиҳасини ишлаб чиқмагунга қадар ҳандақда қурилиш ишларини тўхтатиб туриш тўғрисида кўрсатма берилди.
Изоҳ (0)