Сурхондарё вилоятининг Қумқўрғон туманида жойлашган, қурилиши ва қайта таъмирланишига 16 миллиард сўмдан ортиқ маблағ сарфланган кўприк яна муаммога дуч келди. Бу ҳақда жамоатчиликка вилоят Автомобиль йўллари бош бошқармаси ахборот хизмати хабар берди.
“Полвонтош” селгаси сув сатҳининг табиий ҳолатлар натижасида кескин пасайиб кетиши содир бўлмоқда. Бу ўз навбатида сув оқими тезлиги ошиб кетишига ҳамда кўприкнинг мустаҳкамланган кириш ва чиқиш, ён қиялик қирғоқларига зарар етказмоқда. Кўприкнинг оралиқ қурилмаси таянчлари узунлиги селга сатҳидан 15-20 метр чуқурликда жойлашганлиги сабабли, келгусида кучли сув-тошқин сувлари содир бўлиши кузатилса фақат кўприк қирғоқларига зарар етказиши мумкин, — дейилади кўприкда муаммо пайдо бўлгани ҳақида жамоатчиликка хабар берган вилоят Автомобиль йўллари бош бошқармаси ахборот хизмати хабарида.
Бошқарма мазкур кўприкнинг 2020 йилдаги қайта таъмирланишига 9 миллиард сарфланган демоқда. Бироқ, “Дарё” журналистининг мазкур кўприк ҳақидаги суриштирувлари натижасида 2020 йилда кўприкнинг қайт таъмирига 9,6 миллиард сўм сарфлангани маълум бўлганди.
Ушбу объект Сурхондарё вилоятининг Қумқўрғон тумани ҳудудидан ўтувчи умумий фойдаланишдаги давлат аҳамиятига молик 4Р105 Дарбанд—Бойсун—Элбаён автомобиль йўлининг 76-километр қисмида “Полвонтош” селгаси устида қурилган кўприк ҳисобланади. Мазкур кўприкни қуриш учун “Термиз автойўл лойиҳа” МЧЖ лойиҳачи “Хўшбоқ Али Ангор” хусусий корхонаси бош пудратчи этиб белгиланган. Лойиҳачи томонидан объектнинг лойиҳа ҳужжатлари ишлаб чиқилиб, 2020 йил 26 июнь куни экспертиза хулосаси олинган. Шундан сўнг, 24 август куни буюртмачи ва бош пудратчи ўртасида пудрат шартномаси тузилган. Шартнома қиймати 9 миллиард сўм бўлиб, 2020 йилда бўнак ва бажарилган ишлар учун 7,5 миллиард сўм, 2021 йилда эса 1,5 миллиард сўм маблағ молиялаштириб берилган. Пудратчи томонидан 2020 йилда 7,5 миллиард сўм, 2021 йилда 1,5 миллиард сўмлик ишлар бажарилган. Қурилиш монтаж ишлари тўлиқ якунлангач, 2021 йил 30 декабрь куни ишчи комиссия далолатномасига асосан объект фойдаланишга топширилган, — дейди масъуллар.
Ҳолат Сурхондарё вилояти автомобиль йўллари Бош бошқармаси назоратига олиниб, 2024 йил ажратиладиган бюджет маблағлари ҳисобидан объектдаги нуқсонлар бартараф этилиши билдирилган.
“Дарё”да 2020 йилда эълон қилинган мақолада Сурхондарё вилоятининг Қумқўрғон туманидаги “Кўганли” маҳалласида яшовчи аҳоли ҳудудда 6,5 миллиард сўмга қуриб битказилган кўприк ҳеч қанча вақт хизмат кўрсатмай қулаб тушганини, янги қурилаётган йўл ҳам худди шундай сифатсиз бажарилиб яроқсиз ҳолга келиб қолишидан қўрқаётганини айтганди.
Журналист билан суҳбатлашган аҳоли вакилларидан бири “Мана шу кўприк 1 йил 7 ой деганда шундай авария ҳолатига келиб қолди. Ҳолбуки, бу кўприкка 6,5 миллиард сўм сарфланганди. Иш сифатсиз бажарилгани учун кўприкнинг ‘умри қисқа’ бўлди. Биз йўлимиз ҳам шундай сифатсиз таъмирланиб, ҳеч қанча вақт ўтмасдан яроқсиз ҳолга келишидан қўрқяпмиз”, — деганди. Шундан сўнг Сурхондарё вилоят ҳокимлиги Қумқўрғон туманидаги кўприк ҳақидаги мақолага муносабат билдириб, сифатсиз кўприк қурган қурувчи ишини дастлаб жиноят иши очишни рад этган транспорт прокуратураси ўрганаётганини маълум қилди. Ва кўприкнинг қайта таъмири учун 9 миллиард сўм сарфланишини очиқлаганди.
“Дарё” журналисти Сурхондарё вилояти Автомобиль йўллари Бош бошқармаси ахборот хизмати раҳбари Рустам Ноқулов билан телефон орқали боғланиб, 16 миллиард сўмдан ортиқ маблағ сарфланган кўприк муаммосини бартараф этиш учун бюджетдан тахминан яна қанча маблағ сарфланишига аниқлик киритишга уринди. Қолаверса, суҳбатдошга “кўприкнинг яна муаммога дуч келиши, аниқроғи сел сувлари сабаб кўприк қирғоқларининг зарарланиши аввалдан ҳисобга олинмаганми, оқибатлари ҳақида ўйланмаганми?”, дея савол берди. Суҳбатдош саволларни эшитгач, бунга мутахассислар орқали аниқлик киритиб беришини айтган бўлса-да, ҳозиргача бу ҳақда ахборот бермади.
Изоҳ (0)