“Ўзсаноатқурилишбанк” АТБ МИБдан қарзи бўла туриб, машина сотиб олган. Бу ҳақда “Ревизор” Telegram каналида эълон қилинди.
“Ўзсаноатқурилишбанк” Тошкент шаҳар минтақавий БХО томонидан 220 млн сўмга бир дона Chevrolet Onix Premier 2 Turbo АТ автомобилини харид қилинди.
МИБ маълумотларига кўра, “Ўзсаноатқурилишбанк”нинг 102,3 миллион сўм қарздорлиги мавжуд, — дейилади хабарда.
Ҳолат юзасидан МИБ ахборот хизмати “Дарё”га изоҳ берди. Айтилишича, қарздор “Ўзсаноатқурилишбанк” АТБдан ундирувчи давлат фойдасига 102 миллион 335 минг сўм давлат божи ундириш тўғрисидаги ижро ҳужжати бюронинг Юнусобод туман бўлими иш юритувига 10 январь куни келиб тушган.
“Суд ҳужжатлари ва бошқа органлар ҳужжатларини ижро этиш тўғрисида”ги қонуннинг 23-моддасига асосан ижро иши юритишни қўзғатиш тўғрисида қарор қабул қилиниб, 10 кунлик ихтиёрий муддат белгиланган.
Белгиланган ихтиёрий муддатда қарздорлик бартараф этилмаса, ижро ҳаракатлари давомида банкка тегишли бўлган автотранспорт воситаларига белгиланган тартибда тақиқлар ўрнатилади, — дейилади МИБ ахборотида.
Бюронинг қўшимча қилишича, банк томонидан қарздорлик ихтиёрий муддатда бартараф этилмаса, мажбурий ижро ҳаракатларига киришилиб, қарздорликни ундириш чоралари кўрилади.
“Ўзсаноатқурилишбанк” АТБ ахборот хизматининг “Дарё”га маълум қилишича, 9 январь куни “Марғилон Авто Савдо” МЧЖ билан “Ўзсаноатқурилишбанк” АТБнинг Тошкент шаҳар минтақавий банк хизматлари офиси ўртасида автомобиль сотиб олишга оид 3-268-202400017УЗ-сонли шартнома расмийлаштирилган ва xarid.uzex.uz ахборот порталида 21200102425901-лот рақами билан жойлаштирилган.
“Бироқ кейинчалик ушбу харид объекти билан боғлиқ шартлар ўзгаргани сабабли лот бекор қилинган.
Мазкур харид бўйича шартнома расмийлаштирилган сана (2024 йил 9 январь)да эса, mib.uz сайтида банкнинг солиқ ёки бошқа шахслар олдида ҳеч қандай қарздорлиги мавжуд бўлмаган”, — дейилади банк ахборотида.
Изоҳ (0)