Тошкент вилояти Тошкент туманида жойлашган манзарали боғдорчилик ва ўрмон илмий-тажриба хўжалиги (халқ тилидаги “Дендропарк”) ҳудудида яшиллик даражаси қисқараётгани аниқланди. Бу ҳақда Бош прокуратура ахборот хизмати маълум қилди.
Айтилишича, тегишли идоралар билан ҳамкорликда “Дендропарк” ҳудудидаги ўсимликлар дунёси аҳволи аэрокосмик таҳлил асосида ўрганилган.
“Ўтган асрнинг 60 йилларидан бошлаб мамлакатимиз ҳудудига мослаштириш ва селексия қилиш мақсадида экилган қимматбаҳо навли ноёб ёнғоқ дарахтлари нобуд қилинаётгани маълум бўлди.
Хусусан, ўрганишда дарахтларнинг парваришига масъулиятсизлик билан ёндашилгани оқибатида 103 туп ёнғоқ дарахтининг қуриб қолишига олиб келингани, шунингдек, 85 туп кўп йиллик ёнғоқ дарахти кесилиб, илдизи билан қўпориб олингани аниқланди”, — дейилади прокуратура ахборотида.
Қўшимча қилинишича, ҳудудида турли фуқаролар ва хўжалик юритувчи субъектлар томонидан манзарали боғдорчилик ва ўрмон соҳасига алоқаси бўлмаган хўжалик фаолияти олиб борилаётгани, кўплаб капитал қурилишлар амалга оширилгани аниқланган.
Мазкур қурилишларнинг қонунийлиги ва аэрокосмик таҳлил асосида бошқа дарахтларнинг кесилиш ҳолатлари тегишли давлат идоралари мутахассислари иштирокида тўлиқ ва ҳар томонлама ўрганилиши бошланган.
Бош прокуратура жамоатчиликдан юқоридаги каби қонун бузилиши ҳолатларини аниқлаш ва бартараф этиш борасида барча ташаббускорлар билан ҳамкорликка тайёрлигини билдирган.
Изоҳ (0)