Америкалик модель Кайли Женнернинг улкан ерости бункерига эга ҳашаматли уйи қурилиши якунланмоқда (фото)

Америкалик таниқли модель ва миллиардер, тадбиркор Кайли Женнер ўзининг шахсий ерости бункерига эга вилласининг қурилиш ишларини деярли тугатди. Бу ҳақда “Корреспондент.нет” нашри хабар бермоқда.

Мазкур уйни Кайли уч йил аввал Калифорниянинг Hidden Hills шаҳридан 15 миллион долларга сотиб олган эди. 30 000 квадрат фут ҳажмга эга замонавий уй канадалик архитектор Ричард Лендри томонидан лойиҳалаштирилган.

15 та ётоқхонага эга уйнинг томи ва пардоз ишлари тугатилган бўлиб, унда озиқ-овқат, энергия манбаларига эга бўлган ерости бункери ҳам жойлашган. Хонадон Кайлининг онаси Крис Женнер ва опаси Хлои Кардашянларнинг уйидан узоқ бўлмаган ҳудудда жойлашган.

Крис Женнер ўзининг 8 хонали уйини 20 миллион долларга, Хлои Кардашян эса кўчмас мулкини 17 миллион долларга харид қилишган. Ҳозирча Кайли Женнер ўзининг янги уйига кириши учун узун туннелдан иборат йўлдан ўтиши керак. Катта эҳтимол билан мазкур туннел ерости бункерига олиб боради.

Уйнинг ён тарафида машиналар тўхташ жойи ва хавфсизлик ходимлари яшайдиган уй қурилади, чунки авваллари Кайли жуда кўп бор таъқибларга учраган.

Турмуш ўртоғи Тревис Скотт билан ажрашган Кайли янги хонадонда 6 ёшли қизи Сторми ва икки ёшли ўғли Эйр билан бирга яшайди.