Бугун, 24 ноябрь куни Олий Мажлис Сенатининг қирқ еттинчи ялпи мажлисида кун тартибига ўтишдан аввал Ўзбекистон Ногиронлар ассоциацияси раиси томонидан қилинган мурожаат кўриб чиқилди.
“Ногиронлиги бўлган шахсларнинг ҳуқуқлари тўғрисида”ги қонуннинг 23-моддасида ижтимоий-маиший ва маданий мақсадларга мўлжалланган қурилиш объектларини ҳамда реконструкция қилинаётган объектларни фойдаланишга қабул қилиш назарда тутилган.
Унда объектларни қабул қилиш бўйича фаолият кўрсатадиган давлат қабул комиссияси таркибига ногиронлиги бўлган шахсларнинг жамоат бирлашмалари вакилларини киритиш қатъий белгилаб қўйилган.
“Мазкур масала бўйича Ўзбекистон Ногиронлар ассоциацияси Сенатга мурожаат қилган. Унга кўра, ассоциация ва унинг ҳудудий бўлинмалари вакилларига қурилиш объектларини қабул қилиш масаласида махсус электрон платформадан фойдаланиш имконияти чеклаб қўйилган.
Ушбу масалани ҳал қилиш юзасидан Қурилиш ва уй-жой коммунал хўжалиги вазирлигига Адлия вазирлиги томонидан хатлар, тақдимномалар киритилган, аммо масала якунига етказилмаган.
Конституциямизда давлатимиз ижтимоий давлат деб белгилаб қўйилган. Шундан келиб чиқиб, мазкур масала муҳим ижтимоий аҳамиятга эгалигини, барча давлат идоралари ижтимоий масъулияти қатъий эканлигини кўриб турибмиз.
Яъни давлатимизда аҳолининг ижтимоий жиҳатдан эҳтиёжманд тоифаларининг турмуш сифатини оширишга, жамият ва давлат ҳаётида тўлақонли иштирок этиши учун уларга шарт-шароитлар яратишга қаратилган чоралар кўрилиши зарур.
Қурилиш ва уй-жой коммунал хўжалиги вазирлиги мазкур масалани тегишли қонун талаби асосида узил-кесил ҳал қилиши керак”, — деди Танзила Норбоева.
Мажлисда иштирок этаётган Ўзбекистон Ногиронлар ассоциацияси раиси Ойбек Исоқов мазкур масала юзасидан ўз фикрларини билдириб ўтди.
“Ўтган йили Сенатнинг қарори чиққан эди. Унда тўртта ташкилот: Ногиронлар жамияти, Кўзи ожизлар жамияти, Карлар жамияти ва Ногиронлар ассоциацияси янги қурилаётган объектларнинг давлат қабул комиссияси таркибига киритилсин, деб белгилаб қўйилган эди.
Биз унга кирдик ва декабрдан то апрель ойигача комиссия таркибида электрон калитдан фойдаланаётган эдик. Лекин апрель ойида номаълум сабабларга кўра, Қурилиш ва уй-жой коммунал хўжалиги вазирлиги бизга берилган электрон калитни бекор қилиб юборди. Биз сўраганимизда, улар “Бу техник сабабаларга кўра қилинди. Бир ой ичида электрон калитни берамиз” дейишди, аммо беришмади.
Биз ўша комиссия таркибида бўлсак, кимга халақит беряпти бу нарса? Аҳир бу ҳаммага фойдали-ку. Ногиронлиги бўлган шахсларга қилинган қулайлик ҳамма учун ҳам қулайлик, деб ҳисоблаймиз”, — деди Ойбек Исоқов.
Сенат раиси Вазирлар Маҳкамасининг ваколатли вакилидан мазкур масалани алоҳида назоратга олиб ахборот киритишни сўради.
“Қурилиш ва уй-жой коммунал хўжалиги вазирлигидан бир ҳафта муддатда мазкур масалани тегишли қонун талаблари асосида узил-кесил ҳал қилишни ва ушбу масалага жавобгар бўлган ваколатли ходимни масъулиятсизлик билан ёндашгани учун расман тушунтириш беришларини биз талаб қиламиз. Бир ҳафта муддатдан кейин шахсан ўзим шуғулланаман”, — деди Танзила Норбоева.
Изоҳ (0)