Сурхондарё вилояти Бойсун туманидаги “Дарбанд” маҳалласида яшовчи Арадашер Сафаров йўл қурилиши натижасида уйининг деворлари ёрилиб кетаётгани, бунга масъуллар бефарқ қараётгани ҳақида “Дарё”га мурожаат қилди.
Арадашер Сафаровнинг айтишича, 2021 йилда Бишкек—Тошкент—Элбаён—Душанбе халқаро йўлини қуриш бўйича лойиҳачилар келиб, уйдан 20 метр узоқликда йўл тушишини айтилган.
“Россияда икки йил мардикорлик қилиб, шу уйни қургандим. Бошида уйингизга ҳеч қандай зарар етмайди дейишган эди. Кейинроқ, 2023 йилнинг август ойида қурувчилар келиб, йўл қуришни бошлашди. Йўл темирйўлга кесишиб қолаётгани учун йўлни темирйўлни тагидан олиб ўтишини айтишди.
Уйимдан 8 метр узоқликда кавлашни бошлашди. Ҳозир 14 метр чуқур қазишди. Шу ишлар давомида ковланаётган жойдан то уйимгача бўлган ер 3-4 сантиметр, уйимни деворлари эса 1 сантиметр ёрилиб кетди” – деди Арадашер Сафаров.
Мурожаатчи ҳолатга ойдинлик киритиш мақсадида Термиз шаҳрида жойлашган “Жанубйўллойиҳа” институти директори Абдуққаҳор Йўлдошевга учрашган. Лекин тайинли жавоб ололмаган.
Унинг алоҳида таъкидлашича, қурилиш ҳақида ҳеч ким уларни огоҳлантирмаган.
“Тупроқнинг зичлиги кам, уқаланиб ўпирилиб кетмоқда. Қишлоқда бундай муаммо фақат битта мени уйимда эмас, яна 8 тача хонадонда шу аҳвол”, - деди Арадашер Сафаров.
Ҳолат юзасидан Бойсун тумани ҳокимлиги Арадашер Сафаровнинг аризачига йўллаган жавоб хатида ҳолат ўрганилгани айтилган. Лекин ҳоким имзолаган хатда нима ўрганилгани, қандай хулоса қилингани ҳақида гапирилмаган. Фақат хонадон ва йўл орасида 13 метр масофа борлиги зикр этилган.
Фуқароларнинг қайта-қайта мурожаатидан кейин туман Адлия бўлими масалани ўрганиб чиқиб, туман ҳокимига хат йўллаган. Унда катта йўл кенгайиши мақсадида таъмирлаш ишлари олиб борилаётганлиги сабабли, яшаш хонадонига зарар бераётганлигини, шу боис давлат томонидан компенсация берилиши айтилган.
Туман ҳокимлиги Адлия бўлими томонидан йўллаган хатга жавобан етказилган зарар юзасидан аниқлик киритиш мақсадида тегишли идораларга кўрсатма берилгани қўшимча қилинган.
“Дарё” воқеалар ривожини кузатиб боради.
Изоҳ (0)