Самарқанд вилоятида шаҳарсозлик ҳужжатлари тўлиқ расмийлаштирмаган, инспекциядан рўйхатдан ўтмаган ўзбошимчалик билан қурилаётган 8 та кўп қаватли турар-жой биноси ва битта меҳмонхона қурилиши тўхтатилди. Бу ҳақда “Дарё”га Қурилиш ва уй-жой коммунал хўжалиги соҳасида ҳудудий назорат қилиш инспекцияси ахборот хизмати раҳбари Сарвар Бобоназаров хабар берди.
Фуқаро I.Ҳасанов томонидан қурилаётган бино.
Мазкур ҳолатлар вилоят Қурилиш ва уй-жой коммунал хўжалиги соҳасида ҳудудий назорат қилиш инспекцияси ишчи гуруҳи томонидан аниқланган.
“Строй дом сиёб” МЧЖ томонидан қурилаётган кўп қаватли турар жой биноси.
Навбатдаги мониторинг давомида Самарқанд шаҳрида шаҳарсозлик ҳужжатлари тўлиқ расмийлаштирилмаган қурилишлар аниқланди. Жумладан Самарқанд шаҳар Илғор кўчаси 25-манзилдаги “Riviyera Инвест ХХХ” МЧЖ томонидан қурилаётган турар-жой биноларининг қурилишлари ҳудудий назорат қилиш инспекциясидан рўйхатдан ўтмасдан амалга оширилаётганлиги аниқланди. Ушбу қурилиш ўзбошимчалик билан олиб борилаётганлиги сабабли инспекция томонидан жорий йилнинг март, май ойларида огоҳлантириш хатлари берилиб, шу йилнинг 27 июлида қурилишни тўхтатиш тўғрисида бажарилиши мажбурий бўлган ёзма кўрсатмалар берилган. Бироқ шунга қарамасдан қурилиш ишларини давом эттирганлиги сабабли “Riviyera инвест ХХХ” МЧЖ раҳбарига нисбатан Маъмурий жавобгарлик тўғрисидаги кодексининг 99-моддаси 7-қисми билан маъмурий жавобгарликка тортилган, — дейди Сарвар Бобоназаров.
Масъулнинг билдиришича, ишчи гуруҳ томонидан қурилиш ишларининг сифати ҳам ўрганилганда қурувчи қатор қоидабузарликларга йўл қўйгани аниқланган.
Хусусан, ора ёпма темир бетон плиталар монтаж қилинганда оралиқ масофаси лойиҳада 14 см қолдирилиши кўрсатилган, бироқ жойида 5 см масофа қолдирилган. Перимичкалар лойиҳада кўрсатилган талаблар асосида бажарилмаган ва коррозияга яъни занглашга қарши бўялмаган. Қурилиш материалларини сақлаш учун махсус омборхоналар ташкил қилинмаган. Натижада арматуралар корозияга учрамоқда яъни занглашни бошлаган. Пардадеворларда терилган газаблокларнинг вертикал ва горизонтал чоклари қоришма билан тўлиқ тўлдирилмаган, арматураланган антисейсмик камарлар ишчи лойиҳа асосида бажарилмаган. Шунингдек, объектга олиб келинган плиталарнинг сифати ўрганилганда белгиланган талабларга жавоб бермаслиги аниқланиб, сифатиз плиталар заводга қайтариб юборилди, — дейди масъул.
Қўшимча қилинишича, юқоридаги қонунбузилиш ҳолатлари юзасидан инспекция мутахассислари томонидан 8 та турар-жой, 1 та меҳмонхона ва 1 та бинони қураётган фуқаро ва тадбиркорларга тегишли кўрсатмалар берилиб, шаҳарсозлик ҳужжатларини тўлиқ расмийлаштириш, инспекциядан рўйхатдан ўтиши тушунтирилган. Ва инспекция рўйхатидан ўтгунга қадар объектларда қурилиш-монтаж ишларини тўхтатиш бўйича ёзма кўрсатмалар берилган.
Изоҳ (0)