“Бу мени хатом, минг марта узр сўрайман” — Андижонда вилоят ҳокимлиги ноқонуний уй қурилишига рухсат берилгани учун аҳолидан узр сўради

Андижон шаҳридаги 3-кичик даҳа 1-уйда яшовчи фуқаролар болалар майдончасига мўлжалланган ерда номаълум тадбиркор томонидан 7 қаватли уй қурилаётгани ҳақида Андижон вилояти ҳокимлигига мурожаат қилган.

Аҳоли уларнинг розилигини олмай ноқонуний қурилиш бўлаётгани ҳақида бир неча маротаба ҳокимликка арз қилган. Қурувчи ташкилот 19 ноябрь куни ичимлик суви тармоғи қувурига зарар етказган ва бунинг натижасида даҳа сувсиз қолган. Маҳалла аҳли ҳокимликка яна ўз этирозларини билдирган.

Андижон вилояти ҳокимининг матбуот котиби Муслим Иброҳимовнинг маълум қилишича, мурожаатдан сўнг вилоят раҳбари кўрсатмасига асосан, ичимлик суви бўйича носозликни бартараф этиш учун иш жараёни ташкил этилган ва қурилиш жараёни яқиндан ўрганилган.

“Қурилиш ишларида бир нечта ҳолатлар бўйича хатоликлар аниқланиб, жумладан, тегишли қарорга тўлиқ риоя этилмагани, майдон уй-жой қуриш учун ажратилмагани, кадастр рўйхатидан ўтказишда камчиликларга йўл қўйилгани, энг асосийси, маҳаллий аҳолига ушбу қурилиш ноқулайлик туғдираётгани сабабли, қурилиш жараёни тўхтатилди”, — дейилади матбуот котиби ахборотида.

Тақдим этилган видеода кўринишича, ярим тунда Андижон вилояти камбағалликни қисқартириш ва бандлик бош бошқармаси бошлиғи Махамаджон Нишонов норози аҳоли билан учрашган. У қурилишга рухсат бериш жараёнида хатоликка йўл қўйгани учун одамлардан узр сўраган.

“Ҳужжатни қилиб берганмиз, лекин бу бизни хатомиз. Маҳалланинг аввалги раиси “Ҳамма рози, одамлар роса хурсанд бўлади”, деганди.

Бу мени хатом. Вилоятимиз ҳокими одамларни норози қилиб иш қил демайди. Менга топшириқ берган: бориб, ўрганиб, ўша ерда ишлар қонуний бўлса, қилдириб беринг деган.

Ўтган сафар келганимда сизлар норози бўлганларингизда, бўлди, сизлар норози бўлсанглар, қурилиш бўлмайди, деб кетганман. Минг марта узр сўрайман. Агар сизлар рози бўлмасаларинг қурилиш бўлмайди”, деган Махамаджон Нишонов.

Вилоят ҳокимлиги ахборотида, хатоликка йўл қўйган, яъни ноқонуний қурилиш учун ҳужжатларни расмийлаштириб берган мутасаддиларга қандай чора кўрилгани ҳақида маълумот берилмаган.

“Дарё” воқеалар ривожини кузатиб боради.