“Жарималарни фуқаролар даромадига қараб қўллаш тарафдоримиз” — “Адолат” партияси вакили

“Адолат” СДП жарималарни ойлик маошга қараб қўллашни илгари сурмоқда. Бу ҳақда “Давлат бошқаруви ва суд-ҳуқуқ тизимини такомиллаштириш” мавзусидаги теледебатнинг сайловолди тақдимотида “Адолат” социал демократик партиясидан вакил Дилмурод Исмоилов айтиб ўтди.

Дилмурод Исмоиловнинг таъкидлашича, жарималарни ва бошқа ҳуқуқий таъсир чораларни фуқароларга қўллашда уларнинг даромадига қараб қўллаш айнан социал демократик ғояларга тўла мос келади.

“Мисол қилиб айтайлик. Бир одам 20 млн ойлик олади, яна бири эса 2 млн. Уларга бир хил жарима қўллаш тўғрими? Албатта, нотўғри. Шу нуқтаий назардан бизнинг партия ҳар бир фуқарони даромадига қараб жарималар қўлланилиши адолат мезонига тўғри келади, деган фикрда. Умуман оладиган бўлсак, мол-мулкни хатлаш билан боғлиқ, қарзи борлиги учун чет элга чиқишни тақиқлаш билан боғлиқ, транспортни ушлаб туриш билан боғлиқ жазо чоралар қўлланилиши фуқароларимизга етарли чора ҳисобланади. Фуқароларнинг даромадига қараб жарима белгилаш эса — адолат мезонига тўғри келади, деган фикрдаман”, — дейди “Адолат” социал демократик партияси вакили.

Аввалроқ, Ўзбекистонда йўл ҳаракати қоидаларини бузганлик учун жарима миқдорини ошириш таклиф этилган эди.

Икки йил илгари ҳар бир ҳуқуқбузарлик учун жарима баллари тизими жорий этилиши маълум қилинганди. Бироқ мазкур тизим ҳануз йўлга қўйилмади. Бунда ҳайдовчи тезликни меъёридан оширса 1 балл, қизил чироқда ўца 3 балл “тўплаши” анонс қилинган. Бир йилда қоидабузарликлар жами 12 баллдан ошса, ҳайдовчи автомобиль бошқариш ҳуқуқидан маҳрум бўлиши ҳам таъкидланган.

Жарималарнинг янги миқдорлари

2024 йил 1 октябрдан Ўзбекистонда базавий ҳисоблаш миқдори 340 минг сўмдан 375 минг сўмга оширилади. Шу муносабат билан жарималар миқдорлари қуйидагича ўзгаради:

• Хавфсизлик камарини тақмаслик — 187 500 сўм (ҳозир 170 минг сўм);
• Биринчи тиббий ёрдам тўплами, жилет, ўт ўчириш мосламаси, огоҳлантириш учбурчаги ва техник кўрик йўқлиги учун жарима —187 500 сўм (ҳозир 170 минг сўм);
• Автомобилни ҳужжатсиз бошқариш — 375 000 сўм (ҳозир 340 минг сўм);
• Автомобилни суғуртасиз ҳайдаш — 375 000 сўм (ҳозир 340 минг сўм);
• Қизил чироқдан ўтиш — 750 000 сўм (ҳозир 680 минг сўм);
• Рухсат этилмаган жойда тўхташ — 750 000 сўм (ҳозир 680 минг сўм);
• Автомобиль бошқарув пайти қўл телефонида суҳбатлашиш ва фойдаланиш — 1 миллион 125 минг сўм (ҳозир 1 миллион 20 минг сўм);
• Давлат рақамисиз автомобилни бошқариш — 1 миллион 875 минг сўм (ҳозир 1 млн 700 минг сўм);
• Белгиланган тезликдан ошиш (+20 км/соат) — 375 000 сўм (ҳозир 340 минг сўм);
• Белгиланган тезликдан ошиш (+20–40 км/соат) — 1 миллион 875 минг сўм (ҳозир 1 миллион 700 минг сўм);
• Белгиланган тезликдан ошиш (40+ км/соат) — 3 миллион 375 минг сўм (ҳозир 3 млн 60 минг сўм);
• Қарама–қарши йўналишда ҳаракатланиш — 3 миллион 750 минг сўм (ҳозир 3 миллион 400 минг сўм);
• Маст ҳолатда транспорт воситасини бошқариш — 9 миллион 375 минг сўм (ҳозир 8 миллион 500 минг сўм);
• Ойналари рухсатсиз қорайтирилган транспорт воситасини бошқариш — 9 миллион 375 минг сўм (ҳозир 8 миллион 500 минг сўм).