Сурхондарё вилояти ҳокими Улуғбек Қосимов йиғилишида ундан адолат талаб қилиб, ўзига нисбатан ноҳақлик бўлганини айтган мактаб директори йиғилишдан олиб чиқиб кетилиб, қамоққа олингани ҳақида хабар берилган эди. Ижтимоий тармоқларда директорнинг қамалишига ҳокимликнинг босими сабаб бўлгани ҳақида турли хабарлар тарқалди.
Судьялар олий кенгаши тармоқларда тарқалаётган хабарлар бўйича баёнот берди. Унга кўра, бир неча кундан буён ижтимоий тармоқларда Сурхондарё вилояти Сариосиё туманидаги мактаб директори У.Турсуновага боғлиқ вазият муҳокама қилиниб, унинг маъмурий ҳуқуқбузарлик содир этишда айбланиб, жавобгарликка тортилиши маҳаллий ҳокимликнинг судга босими остида содир бўлганига оид фикрлар билдирилмоқда.
“Судьялар олий кенгаши ҳолат ўрганилганлигини ва мазкур маъмурий ҳуқуқбузарликка оид иш кўриб чиқилишида судьяларга нисбатан босим ёки суд ишларига аралашишга йўл қўйилмаганлигини маълум қилади”, — дейилади хабарда.
Қайд этилишича, У.Турсуновага нисбатан маъмурий иш унинг шикоятига асосан вилоят суди апелляция инстанциясида кўрилиб, ўзгаришсиз қолдирилган. Маъмурий иш материаллари Олий суд кассация инстанциясида кўрилиши натижасида қуйи суд қарорлари ўзгартирилиб, 10 сутка маъмурий қамоқ жазоси 7 суткага келтирилган.
Кассация инстанцияси қарорига нисбатан (7 август ҳолатига) шикоят келиб тушмаган.
Тармоқларда тарқалган видеода Сурхондарё вилояти ҳокими Улуғбек Қосимов Сариосиё туманидаги мактаб директори Умида Турсунова билан тортишгани акс этган.
Сурхондарё вилояти ҳокимлиги ахборот хизмати раҳбар Муродбек Давлатовнинг “Дарё”га билдиришича, тортишув 26 июль куни Сариосиё туманидаги 12-сонли умумий ўрта таълим мактабида содир бўлган.
Вилоят ҳокими Умида Турсуновага лавозимидан олинганини айтгач, директор “менинг нима айбим бор?” деб сўрайди. “Эплолмаганинг учун, бутун дунёга шарманда қилганинг учун”, дея жавоб берган вилоят ҳокими.
У ерда нима бўлганини сиз қаердан биласиз? “Муҳитни буздинг”, дейсиз, нима муҳит бузилган у ерда? Мактабнинг томорқасигача сотиб юборишяпти, шунча ёзганимизга индамайлик деб... Аҳволни ўрганадиган одам йўқ, буларнинг ҳаммасининг тили бир, — дейди Умида Турсунова вилоят ҳокимининг даккиси ноўрин эканини таъкидлар экан.
Воқеа давомида мактаб директори “Вилоят ҳокимига тўғри маълумот киритилиши керак. Йўқот, йўқот, йўқот, нима қиляпман мен? Сенлар мактабда хоҳлаган ишингни қилдинг, ҳеч ким ҳеч нарса қилмади-ку?! Менга чора кўриладими? Нимага ташқарига чиқаман? Мана шу ерда туриб охиригача эшитаман, президентга айтадиган гапим бор. Оца, мени Ўзбекистон олдига олиб чиқиб, отиб ташласин”, — дейди. Шундан сўнг директор ички ишлар органи ходимлари томонидан мажлислар залидан олиб чиқиб кетилган.
Мажлислар залини тарк этаётган Умида Турсунова вилоят ҳокими Улуғбек Қосимовга қарата “Ҳайф сиздай вилоят ҳокимига”, дейди.
Муродбек Давлатовнинг қўшимча қилишича, Умида Турсунова дастлаб ўқитувчиларга қўпол муомаласи сабаб жамоатчилик назарига тушган. Шунингдек, у мактабга мурожаатни ўрганишга борган журналистларнинг камерасига шикаст етказган.
Изоҳ (0)