Президент Шавкат Мирзиёев раислигида Андижон вилоятида бўлиб ўтган йиғилишда давлат раҳбари Андижондаги санъат мактабига Шерали Жўраев номини беришни таклиф қилиб, марҳум санъаткор ҳақида гапирди.
Давлат раҳбари ўзбек қўшиқчилик санъати ривожида ўчмас из қолдирган Ўзбекистон ва Тожикистон халқ артисти, Алишер Навоий мукофоти совриндори, машҳур ҳофиз Шерали Жўраев ёшларга катта мактаб қолдириб кетганини қайд этган.
“Шерали Жўраев ёшларга катта мактаб қолдириб кетган, десак тўғри бўлади. Агар умр пайтида адолатсизлик бўлмаганда эди, бугун ёнимизда бўлар эди”, — дейди президент.
Давлат раҳбари Андижон шаҳридаги санъат мактабига Шерали Жўраев номини бериш таклифини илгари сурди. Бу мактаб Мусиқа ва санъат коллежига айлантирилиб, грант асосида замонавий кадрлар тайёрлаш йўлга қўйилади. Янги ўқув ва турар жой биноси, зарур инфратузилма объектлари барпо этилади, шунингдек, Шерали Жўраев бюсти ўрнатилади.
Шунингдек, Шоҳжаҳон Жўраев отасининг 25 йилга яқин тақиқда бўлгани ва президентни ҳамиша ота деб атагани ҳақида гапирди.
“Отамизнинг ижодини икки паллага бўладиган бўлсам: 90 йилгача бўлган даврларда 25 йилга яқин тақиқда эдилар. Отамиз ижодининг иккинчи даври 2016 йилдан бошланди, сизнинг шарофатингиз ва эътиборингиз билан. Биз ҳар йили Мустақиллик байрамини томоша қилиб, отамиз чиқармикан, “Ўзбегим”ни айтармикан, деб дуо қилардик. Шу кунни сиз отамизга яна қайтиб бердингиз. Ва биринчи келиб гапирган гапи шу бўлдики — сизни ота деб гапирар эдилар — ота менинг 40 ёшимни қайтариб бердилар, дедилар. Биз ҳам уйда сизни ота деймиз”, — дейди Шоҳжаҳон Жўраев.
Ўзбекистон халқ артисти Шерали Жўраев 4 сентябрь куни 77 ёшида ҳаётдан кўз юмди. Шерали Жўраев 50 йилдан зиёд ижоди давомида “Ўзбегим”, “Соҳибқирон”, “Эгаси бор юрт”, “Карвон”, “Сарбон”, “Инсон қасидаси” каби 600 га яқин қўшиқ яратган. Унинг “Биринчи муҳаббатим”, “Ёшлигимиз”, “Ой юзингга”, “Ошиқлар сардори”, “Дўст бўлсанг, ёнимда тур” каби ашулалари халқ қўшиқларига айланиб кетган.
Хонанда мумтоз шоирлар ғазалларини куйга солиб, ўзбек халқи меросини ёш авлодга ва жаҳонга танитишга улкан ҳисса қўшган. Шерали Жўраев 1981 йилда “Ўзбекистонда хизмат кўрсатган артист”, 1987 йилда “Ўзбекистон халқ артисти” фахрий унвонлари, 2018 йилда “Фидокорона хизматлари учун” орденига сазовор бўлган.
Шавкат Мирзиёев 2022 йилда Шерали Жўраевга туғилган куни муносабати билан табрик йўллаган. “Эл-юртимиз сизни бутун ҳаётини ўзбек маданияти ва санъатини ривожлантиришга бағишлаган, ўз ижодий мактабини яратган улкан ва бетакрор истеъдод эгаси, фидойи ва миллатпарвар шахс сифатида яхши билади ва юксак қадрлайди”, дейилади табрикда.
Изоҳ (0)