“Jarimalarni fuqarolar daromadiga qarab qo‘llash tarafdorimiz” — “Adolat” partiyasi vakili

“Adolat” SDP jarimalarni oylik maoshga qarab qo‘llashni ilgari surmoqda. Bu haqda “Davlat boshqaruvi va sud-huquq tizimini takomillashtirish” mavzusidagi teledebatning saylovoldi taqdimotida “Adolat” sotsial demokratik partiyasidan vakil Dilmurod Ismoilov aytib o‘tdi.

Dilmurod Ismoilovning taʼkidlashicha, jarimalarni va boshqa huquqiy taʼsir choralarni fuqarolarga qo‘llashda ularning daromadiga qarab qo‘llash aynan sotsial demokratik g‘oyalarga to‘la mos keladi.

“Misol qilib aytaylik. Bir odam 20 mln oylik oladi, yana biri esa 2 mln. Ularga bir xil jarima qo‘llash to‘g‘rimi? Albatta, noto‘g‘ri. Shu nuqtaiy nazardan bizning partiya har bir fuqaroni daromadiga qarab jarimalar qo‘llanilishi adolat mezoniga to‘g‘ri keladi, degan fikrda. Umuman oladigan bo‘lsak, mol-mulkni xatlash bilan bog‘liq, qarzi borligi uchun chet elga chiqishni taqiqlash bilan bog‘liq, transportni ushlab turish bilan bog‘liq jazo choralar qo‘llanilishi fuqarolarimizga yetarli chora hisoblanadi. Fuqarolarning daromadiga qarab jarima belgilash esa — adolat mezoniga to‘g‘ri keladi, degan fikrdaman”, — deydi “Adolat” sotsial demokratik partiyasi vakili.

Avvalroq, O‘zbekistonda yo‘l harakati qoidalarini buzganlik uchun jarima miqdorini oshirish taklif etilgan edi.

Ikki yil ilgari har bir huquqbuzarlik uchun jarima ballari tizimi joriy etilishi maʼlum qilingandi. Biroq mazkur tizim hanuz yo‘lga qo‘yilmadi. Bunda haydovchi tezlikni meʼyoridan oshirsa 1 ball, qizil chiroqda o‘tsa 3 ball “to‘plashi” anons qilingan. Bir yilda qoidabuzarliklar jami 12 balldan oshsa, haydovchi avtomobil boshqarish huquqidan mahrum bo‘lishi ham taʼkidlangan.

Jarimalarning yangi miqdorlari

2024-yil 1-oktyabrdan O‘zbekistonda bazaviy hisoblash miqdori 340 ming so‘mdan 375 ming so‘mga oshiriladi. Shu munosabat bilan jarimalar miqdorlari quyidagicha o‘zgaradi:

• Xavfsizlik kamarini taqmaslik — 187 500 so‘m (hozir 170 ming so‘m);
• Birinchi tibbiy yordam to‘plami, jilet, o‘t o‘chirish moslamasi, ogohlantirish uchburchagi va texnik ko‘rik yo‘qligi uchun jarima —187 500 so‘m (hozir 170 ming so‘m);
• Avtomobilni hujjatsiz boshqarish — 375 000 so‘m (hozir 340 ming so‘m);
• Avtomobilni sug‘urtasiz haydash — 375 000 so‘m (hozir 340 ming so‘m);
• Qizil chiroqdan o‘tish — 750 000 so‘m (hozir 680 ming so‘m);
• Ruxsat etilmagan joyda to‘xtash — 750 000 so‘m (hozir 680 ming so‘m);
• Avtomobil boshqaruv payti qo‘l telefonida suhbatlashish va foydalanish — 1 million 125 ming so‘m (hozir 1 million 20 ming so‘m);
• Davlat raqamisiz avtomobilni boshqarish — 1 million 875 ming so‘m (hozir 1 mln 700 ming so‘m);
• Belgilangan tezlikdan oshish (+20 km/soat) — 375 000 so‘m (hozir 340 ming so‘m);
• Belgilangan tezlikdan oshish (+20–40 km/soat) — 1 million 875 ming so‘m (hozir 1 million 700 ming so‘m);
• Belgilangan tezlikdan oshish (40+ km/soat) — 3 million 375 ming so‘m (hozir 3 mln 60 ming so‘m);
• Qarama–qarshi yo‘nalishda harakatlanish — 3 million 750 ming so‘m (hozir 3 million 400 ming so‘m);
• Mast holatda transport vositasini boshqarish — 9 million 375 ming so‘m (hozir 8 million 500 ming so‘m);
• Oynalari ruxsatsiz qoraytirilgan transport vositasini boshqarish — 9 million 375 ming so‘m (hozir 8 million 500 ming so‘m).