Президент совғаси сифатида берилган Tahoe автомобилини шаҳар ҳудудида соатига 110 км тезликда бошқарган Асадхўжа Мўйдинхўжаев жаримага тортилди. Бу ҳақда Тошкент шаҳар ИИББ Йўл ҳаракати хавсизлиги бошқармаси хабар берди.
Маълум қилинишича, Маъмурий жавобгарлик тўғрисидаги кодекснинг 128-3-моддаси 3-қисмига (транспорт воситалари ҳайдовчиларининг белгиланган ҳаракат тезлигини ошириб юбориши) мувофиқ маъмурий баённома расмийлаштирилиб у билан билан профилактик суҳбат олиб борилди.
Ушбу моддага кўра, транспорт воситалари ҳайдовчиларининг белгиланган ҳаракат тезлигини соатига 20 километрдан ортиқ, лекин 40 километрдан кўп бўлмаган катталикда ошириб юбориши БҲМнинг беш баравари миқдорида (3 миллион 60 минг сўм) жарима солишга сабаб бўлади.
Боксчи Асадхўжа Мўйдинхўжаев Президент совғаси сифатида берилган автомобилда Тошкент кўчаларида 110 км/соат тезликда ҳаракатланиб, видеони ижтимоий тармоққа жойлаганди.
Асадхўжа Мўйдинхўжаев Франциянинг Париж шаҳрида ёзги Олимпиада баҳсларида бокс мусобақаларида ғолиб бўлиб, олтин медални қўлга киритганди. Олтин медал соҳибларига президент совғаси сифатида 200 минг АҚШ доллари, икки қаватли коттедж билан бирга Tahoe автомобили совға қилинган.
Изоҳ (0)