Турк халқи ўз тарихига катта эътибор қаратади ва нафақат ёш авлоди, балки бутун дунёга мустақиллик ва тараққиёт учун улар қандай воқеаларни бошдан кечирганини эслатишга ҳаракат қилади. Ёрқин воқеаларга бой тарихий сериаллар эса ушбу мамлакат ўтмишини ўрганишга ёрдам беради.
“Эртуғрул” (2014-2019)
“Эртуғрул” — продюсер Меҳмет Боздағ томонидан яратилган тарихий саргузашт телесериал. Ундаги воқеалар мусулмон ўғуз турклари тарихига асосланган бўлиб, XIII асрга тегишли давр ҳақида ҳикоя қилинади. Воқеалар марказида Усмонлилар империясининг асосчиси Усмон I нинг отаси Эртуғрул Бей ҳаёти туради. Тарихий сериални суратга олиш ишлари Туркиянинг Аланя, Бейкоз ва Невшеҳир шаҳарларида олиб борилган. Сериал 2014 йил 10 декабрда Туркиянинг TRT 1 телеканалида намойиш этилган.
“Ҳукмдор Усмон” (2019- ҳозирга қадар)
“Ҳукмдор Усмон” тарихий жанговар турк сериали ҳам Меҳмет Боздағ томонидан суратга олинган бўлиб, “Эртуғрул” нинг давомий қисми ҳисобланади. Сериал сюжети Эртуғрулнинг ўғли Усмон Ғозийнинг мустақиллик учун Салжуқийлар салтанатига қарши қандай курашгани ҳақида ҳикоя қилади. Империя яратиш учун Усмон ички душманларни мағлуб этиши, сўнгра кучли Мўғул ва Византия империялари билан тўқнашувга киришиши керак бўлади.
“Курт Сейит ва Александра” (2014)
“Курт Сейит ва Александра” — таниқли турк ёзувчиси Нермин Безменнинг “Курт Сейит ва Шура” романи асосида ишланган бўлиб, сериал ХХ аср бошларида содир бўлган реал воқеаларга асосланган. Унда бош қаҳрамонлар Россия империясининг қулаши ҳамда Октябрь инқилобидан омон қолишади. Фожиалар, кўплаб йўқотишлар, шафқатсиз умидсизликларга тўла тарихий воқеалар билан бирга чор армиясининг собиқ офицери лейтенант Курт Сейит ва аристократлар оиласидан бўлган ўн олти ёшли Шура ўртасидаги севги ҳақида ҳам ҳикоя қилинади.
“Алп Арслон: Буюк салжуқий” (2021)
Режиссёр Седат Инжи ва продюсер Эмре Конук томонидан суратга олинган мазкур тарихий сериал Алп Арслоннинг Салжуқийлар империясининг султони сифатида ҳукмронлик қилган даврда содир бўлган сиёсий воқеалар ва урушлар ҳақида ҳикоя қилади.
“Қалбим султони” (2018)
2018 йилда суратга олинган тарихий мелодрама жанридаги кўп қисмли бадиий фильм Россия ва Туркия кинематографлари ҳамкорлигида суратга олинган. Унда Россия империяси амалдорининг қизи Анна элчихонада ўқитувчи бўлиб ишлайди. Султон Маҳмуд халқ орасига кетаётиб, унга дуч келади ва қизнинг ақл-заковати ва билимига қойил қолади. У Аннани саройга ўз фарзандларига ўқитувчи бўлиб ишлашга таклиф қилади. Вақт ўтиб улар бир-бирига кўнгил қўяди.
“Ватаним сенсан” (2016-2018)
“Ватаним сенсан” ҳарбий-тарихий мелодрама бўлиб, сюжет Туркияда мустақиллик уруши бошланиши ҳақида ҳикоя қилади. Усмонли империясининг офицери капитан Жевдет яқин дўстининг хиёнатидан сўнг, юнон қўшини томонидан асирга олинади. Ўз ватанини қутқариш ва оиласига қайтиш учун Жевдет душман томонига ўтишга мажбур бўлади.
“Афсона”
“Афсона” сериали XIII асрда турклар исломни қабул қилган даврдаги Ўрта Осиёда бўлган воқеаларга асосланган. Оққиз Ўрта Осиёнинг тоғли ҳудудларида яшайди. У отасини ўлдирган Алпағу Хоннинг айби билан эрта етим қолади. Шу сабабли қиз ўзини боқиш, ҳимоя қилишни ўрганиш учун эрта улғайишга мажбур бўлади ва Оққиз душманларига қарши туришга қодир ёш жангчи айланади. У болалигида хондан ўч олишга ўзига ваъда беради ва унинг бойлигини ўғирлаб, камбағалларга тарқатади. Аммо қизнинг ҳаёти энг ашаддий душманининг ўғли билан учрашганда тубдан ўзгариб кетади.
Изоҳ (0)