Butun dunyodagi kino sanoatida ajoyib yangiliklar shunchalik ko‘pki, barcha yangi filmlar bilan tanishishga doim ham vaqt topa olmaymiz. Bunday vaqtda yorqin voqealarni o‘zida jamlaydigan va bir kechada tomosha qilish mumkin bo‘lgan mini seriallarni tavsiya qilamiz. RBK-Ukraina nashri so‘nggi yillarda chiqqan 5 ta eng qiziqarli mini seriallarni to‘pladi.
“Begunoh” (Harlan Koben)
Mateo Vidal ismli talaba mushtlashuvda tasodifan bir odamni o‘ldirib qo‘yadi va 9 yilga ozodlikdan mahrum bo‘ladi. Ammo qamoqdan chiqqach, o‘tmishni unutishga va yangi hayot boshlashga qaror qiladi. Ukasi uni advokatlik firmasiga ishga joylashtiradi.
Meteoning shaxsiy hayoti yaxshilanadi, uning rafiqasi homilador bo‘ladi va yosh oila yangi uy xarid qiladi. Barchasi yaxshi ketayotgan bir vaqtda Meteoning rafiqasi xizmat safariga ketadi va uning telefonidan g‘alati xabarlar kela boshlaydi. So‘ng shubhali yigit uni mashinada urib yuboradi va Meteoga qurol bilan tahdid qiladi. Tushunarsiz voqealar ketma-ketligi qahramonni boshi berk ko‘chaga olib keladi.
“Bir kecha”
Serialdagi voqealar bir erkakning go‘zal ayol bilan tasodifan tanishuvi va u bilan tunab qolishi bilan boshlanadi. Ertalab esa erkak uning jasadi yonida uyg‘onadi. Shubhasiz, erkak asosiy gumondorga aylanadi, biroq u kechasi nima bo‘lganini eslay olmaydi. Syujet birinchi daqiqalardanoq o‘ziga jalb qiladi va shuning uchun barcha epizodlarni oxirigacha tomosha qilishni xohlaysiz.
“Ko‘zlar ortida”
Luiza ismli yolg‘iz ona barda kelishgan erkak bilan tanishadi va u bilan ishqiy munosabatda bo‘ladi, ammo tez orada Devid uning yangi rahbari ekanligi ma’lum bo‘ladi. Devid oilali ekanligini bilsa ham Luiza bu munosabatlarni to‘xtata olmaydi.
Vaqt o‘tishi bilan ayol Devid rafiqasining yaqin dugonasiga aylanadi va ushbu oilada qandaydir vahshiy ishlar yashiringanidan shubhalana boshlaydi. Serialdagi sevgi uchburchagi, dramatik va oldindan aytib bo‘lmaydigan voqealar tomoshabinni har bir epizodda hayratda qoldiradi.
“Avvalgi ayol”
Jeyn farzandidan ayrilgach, hayotini noldan boshlaydi va arxitektor Edvard Monkford tomonidan qurilgan “aqlli” uy bunga erishishda yordam berishiga umid qiladi. Vaqt o‘tishi bilan uyda g‘ayrioddiy voqealar sodir bo‘la boshlaydi va Jeyn yashash joyining sirlaridan voqif bo‘ladi. U yerda avval yashagan va Jeynga juda o‘xshash tashqi ko‘rinishga ega ayolning vafot etgani uni qo‘rqita boshlaydi.
“Oliviya Kitterij”
Mini serialda butun umrini ish va oilasiga bag‘ishlagan keksa ayol haqida hikoya qilinadi. U uzoq yillar davomida matematika o‘qituvchisi bo‘lib ishlagan va har doim o‘zini dunyodan nafratlangandek tutgan. Serialda bosh qahramonning 25 yillik umri va undagi yashirin ma’noli voqealar o‘rin olgan.
Izoh (0)